Posted: 01/31/2013 04:58 PM IST

వైఎస్ఆర్ కాంగ్రెస్ పార్టీ అధినేత వైఎస్ జగన్మోహన్ రెడ్డి , గనుల కుంభకోణంలో  అరెస్టై జైల్లో  ఉన్న  గాలి జనార్థన్ రెడ్డి,  ఓఎంసీ కేసులో  నిందితులుగా ఉన్న మరికొంతమందికి  సీబీఐ కోర్టు  రిమాండ్  పొడిగించింది.  బెయిల్ కోసం ఎదురుస్తున్న నాయకులు? వీరికి బెయిల్ ఇవ్వటానికి  సీబీఐ కోర్టు  నిరాకరించింది. జగన్ అక్రమాస్తుల కేసు, ఎమ్మార్, ఓఎంసీ కేసు నిందితులకు నాంపల్లి సీబీఐ కోర్టు రిమాండ్ పొడిగించింది. ఈ కేసులకు సంబంధించి జగన్, గాలిజనార్దన్‌రెడ్డి, శ్రీనివాస్‌రెడ్డి, మోపిదేవి వెంకటరమణ, బ్రహ్మానందరెడ్డిలను వీడియో కాన్ఫరెన్స్ ద్వారా విచారించిన కోర్టు ఫిబ్రవరి 14 వరకు రిమాండ్ పొడిగించింది. జగన్ అక్రమాస్తుల కేసులో నిందితుడుగా ఉన్న మంత్రి ధర్మాన ప్రసాద్‌రావు నాంపల్లి కోర్టుకు హాజరయ్యారు.

ఈ కేసుకు సంబంధించి ధర్మానను ప్రశ్నించేందుకు ప్రభుత్వ అనుమతి అవసరం లేదని ఈనెల 17న సీబీఐ కోర్టు ఆదేశం మేరకు విచారణ కొనసాగుతోంది. మరోవైపు ఎమ్మార్ కేసు నిందితుడు ఎల్వీ సుబ్రహ్మణ్యం హాజరుకాకపోవడంపై సీబీఐ కోర్టు ఆగ్రహం వ్యక్తపరిచింది. మీటింగ్‌లు ఉన్నాయని ఎన్నిసార్లు తప్పించుకుంటారని ఎల్వీ న్యాయవాదులను కోర్టు ప్రశ్నించింది. ఇప్పటి వరకు ఎన్ని మీటింగులకు హాజరయ్యారో తెలపాలని లాయర్లను కోర్టు ఆదేశించింది. అయితే తదుపరి విచారణకు ఎల్వీ సుబ్రహ్మణ్యం హాజరవుతారని కోర్టుకు లాయర్లు తెలిపారు. ఈ కేసుకు సంబంధించి ఒక్కసారి కూడా ఎల్వీ కోర్టుకు హాజరుకాలేని విషయం తెలిసిందే.