Posted: 12/06/2012 09:06 AM IST

చిల్లర వర్తకంలో విదేశీ ప్రత్యక్ష పెట్టుబడుల(ఎఫ్‌డీఐ)కు నిన్న లోక్ సభలో జరిగిన ఓటింగులో ప్రభుత్వం చావు తప్పి కన్ను లోట్టపోయినట్లు గెలిచింది. ప్రతిపక్షాలు పెట్టిన తీర్మానాలు వీగిపోయి, ఓటింగ్ లో పాల్గొనకుండా వాకౌట్ చేసి బయటి నుండి పరోక్షంగా సహకరించడంతో యూపీఏ సర్కార్ గెలిచింది. ఈ గెలుపు పరిపూర్ణం కాకపోయినా, యూపీఏకి ఇది కాస్త ఊరట కలిగించే విషయమే. లోక్‌సభలో మెజారిటీ నిరూపించుకోవడానికి మేజిక్ మార్కు 272. కాగా, ఓటింగ్‌లో ప్రభుత్వానికి వచ్చిన ఓట్లు కేవలం 253 మాత్రమే వచ్చాయి. లోక్ సభలో ఎఫ్ డీఐ పై యూపీఏ సర్కారు నెగ్గినా రాజ్యసభలో నెగ్గడం కష్టంగానే ఉంది. వాస్తవానికి, ఆ రెండు పార్టీలూ ఓటింగ్‌లో పాల్గొనకుండా సభలోనే ఉండి ఉన్నా ప్రభుత్వం ఓడిపోయేదే.  మొత్తంమీద 471 మంది ఓటింగ్‌లో పాల్పంచుకోగా.. తీర్మానానికి వ్యతిరేకంగా 253 ఓట్లు రాగా.. ప్రభుత్వానికి వ్యతిరేకంగా 218 ఓట్లు పడ్డాయి.  ఎన్డీయే పక్షాలతోపాటు వామపక్షాలు, తృణమూల్, అన్నాడీఎంకే, బీజేడీ, టీడీపీ, టీఆర్ఎస్ తదితర పార్టీలు ప్రభుత్వానికి వ్యతిరేకంగా ఓటేశాయి. ఎఫ్‌డీఐలకు లోక్‌సభ ఆమోదం లభించడంపై ప్రధాని మన్మోహన్, యూపీఏ అధినేత్రి సోనియా గాంధీ సంతోషం వ్యక్తం చేశారు. తాము తీసుకొచ్చిన ఎఫ్‌డీఐ విధానానికి లోక్‌సభ ఆమోదం లభించిందని, రాజ్యసభలో కూడా గెలుస్తామని మన్మోహన్ వ్యాఖ్యానించారు . కానీ ప్రతి పక్షాలు మాత్రం ప్రభుత్వం గెలిచి ఓడిందని, ఇప్పటికైనా ఈ నిర్ణయాన్ని వెనక్కి తీసుకోవాలని డిమాండ్ చేస్తున్నాయి.