Posted: 10/31/2012 04:41 PM IST

బంగాళాఖాతంలో ఏర్పడిన వాయుగుండం తుపాన్ గా మారింది. చెన్నైకి 5వందల కిలోమీటర్ల దూరంలో తుపాను కేంద్రీకృతమైంది. ఇవాళ సాయంత్రం నెల్లూరు-నాగపట్టణం మధ్య  తీరం దాటే అవకాశమున్నట్లు వాతావరణ శాఖ తెలిపింది. నీలం తుపాను ప్రమాదం పొంచి ఉండటంతో రాష్ట్ర సర్కారు అప్రమత్తమైంది. అటు తమిళనాడు ప్రభుత్వం తీర ప్రాంతంలోని పాఠశాలలకు సెలవు ప్రకటించింది.బంగాళాఖాతంలో ఏర్పడిన వాయుగుండం క్రమంగా బలపడి తుపాన్ గా మారింది. తుపాన్ చెన్నైకు ఆగ్నేయంగా 500 కిలోమీటర్ల దూరంలో కేంద్రీకృతమైంది.

ఈ తుపాను నెల్లూరు -నాగపట్నం మధ్య తీరం దాటే అవకాశం ఉంది. తుపాను కారణంగా సముద్రంలో అలల ఉధృతి పెరిగింది. గంటకు సుమారు 45 నుంచి 60 కిలోమీటర్ల బలమైన ఈదురుగాలులు వీస్తాయని, మత్స్యకారులు సముద్రం వేటకు వెళ్లరాదని అధికారులు హెచ్చరించారు.తుపాను ప్రభావంతో ఇప్పటికే తమిళనాడు తీర ప్రాంతాల్లో భారీగా, రాయలసీమలో అక్కడక్కడ వర్షాలు కురుస్తున్నాయి. తీరం వెంబడి బలమైన గాలులు వీస్తున్నాయి. తీవ్ర వాయుగుండం తుఫానుగా మారిన తర్వాత తీరం దిశగా వచ్చేసరికి గాలుల తీవ్రత పెరుగుతుంది. నైరుతి బంగాళాఖాతంలో ఏర్పడ్డ అల్పపీడనం తీవ్ర వాయుగుండంగా మారడంతో తీరప్రాంత జిల్లాల్లో అలజడి మొదలైంది.

తుపాను ప్రభావంతో తమిళనాడులో, నెల్లూరు, ప్రకాశం, చిత్తూరు జిల్లాల్లో భారీ వర్షాలు కురిసే అవకాశం ఉందని వాతావరణ శాఖ అధికారులు తెలిపారు. తమిళనాడు, పుదుచ్చేరి పరిధిలోని పలు ప్రాంతాల్లో భారీ వర్షాలు కురిసే అవకాశాలున్నాయని చెప్పారు. వచ్చే 48 గంటలు సముద్రం కల్లోలంగా ఉంటుందని వాతావరణ శాఖ అధికారులు తెలిపారు.కృష్ణపట్నం, మచిలీపట్నం ఓడ రేవుల్లో ఇప్పటికే మూడో నెంబరు ప్రమాదహెచ్చరిక ఎగరేయగా, తమిళనాడులోని పలు తీర ప్రాంతాల్లో నాలుగోనెంబరు హెచ్చరిక ఎగరేశారు. తుపాను ప్రభావంతో నెల్లూరు జిల్లా తీర ప్రాంతాల్లో అలల ఉధృతి పెరిగింది. అల్లూరు మండలం ఇస్కపాళెం వద్ద తుఫానుషెల్టర్ కుప్పకూలింది.

నీలం తుపాను ముప్పు పొంచి ఉండడంతో రాష్ట్ర సర్కార్ అప్రమత్తమైంది. ముందస్తు సహాయ చర్యలు ప్రారంభించింది. జిల్లాల కలెక్టర్లతో రెవిన్యూ శాఖ మంత్రి రఘువీరారెడ్డి సమీక్షా సమావేశం నిర్వహించి లోతట్టు ప్రాంతాల ప్రజలను సురక్షిత ప్రాంతాలకు తరలించాలని ఆదేశాలు జారీ చేశారు.మరోవైపు చెన్నై పోర్టులో అధికారులు ఏడో నంబరు ప్రమాద హెచ్చరికను జారీ చేశారు. నాగపట్నం, తూతుకూడి, కారేకల్ పోర్టుల్లో ఐదో నంబర్ ప్రమాద హెచ్చరికలు జారీ చేశారు. నీలం తుపాను కారణంగా చెన్నైతో పాటు తీరప్రాంతంలోని 8జిల్లాల్లోని పాఠశాలలకు ప్రభుత్వం సెలవు ప్రకటించింది. తిరువళ్లూరు, కాంచీపురం, విల్లుపురం, కడలూరు, తిరువాయుర్, నాగపట్నం జిల్లాల్లో రెడ్ అలర్ట్ ప్రకటించారు.