Posted: 01/31/2012 02:57 PM IST

కనకపు సింహాసనము

శునకము కూర్చుండబెట్టి శుభలగ్నమునం

దొనరగ బట్టముగట్టిన

వెనుకటి గుణమేల మాను వినరా సుమతీ

కనకపు సింహాసనము- బంగారు సింహాసనం, శునకము కూర్చుండబెట్టి- కుక్కను కూర్చోబెట్టి, శుభలగ్నమునందొనరగ- మంచి ముహూర్తంలో, పట్టము గట్టిన- పట్టాభిషేకం చేసినట్లయితే, వెనుకటి గుణమేలమాను- అంతకుముందున్న గుణాన్నెందుకు మానుకుంటుంది.

కుక్కని తీసుకునివచ్చి దాన్ని బంగారు సింహాసనం మీద కూర్చోబెట్టి మంచి ముహూర్తాన ఎంతో వేడుకగా పట్టాభిషేకం చేసినంత మాత్రంచేత అది తన లక్షణాలను మార్చుకుంటుందా అంటారు సుమతీ శతక కర్త.

 

ఈ పద్యాలను పూర్వకాలంలో పాఠ్య భాగాల్లో పొందుపరచి వల్లె వేయించేవారు. పద్యాలు ఛందోభద్ధంగా ఉన్నందువలన ఈ పద్యాలు చదవటానికి కూడా చాలా బాగుంటాయి పైగా, ఏ కాలానికైనా వర్తించే పద్యాలివి. ప్రస్తుతం నడుస్తున్న రాజకీయ వైఖరి చూస్తే ఇది సత్యమేనని తెలుస్తుంది. ఆకాలంలో సింహాసనం మీద కూర్చున్న రాజులే కాదు, ఈ కాలంలో పదవులనలంకరిస్తున్న మంత్రులు కూడా అంతే. ఎన్నో చట్టాలు చేసుకుని ఎన్నికలనే ప్రజాస్వామ్య విధానంలో గద్దె మీద కూర్చోబెడితే చివరకు వాళ్ళు ప్రజలకేం చేస్తున్నారన్నది మన ఎదురుగా స్పష్టంగా ఉంది. ముఖ్యంగా నేర చరిత వున్నవారు నాయకులుగా చెలామణై ప్రవర్తించిన తీరు మనకి తెలియదా. రకరకాల మోసాలు, నేరాలు చేసినవారిని పదవి కట్టబెట్టి గద్దె మీద ఎక్కించినంత మాత్రాన వారి గుణం మారి వారిలో సేవా తత్పరత వచ్చేస్తుందా?

-శ్రీజ