Minister Kondru Murali

Posted: 06/23/2012 10:53 AM IST

minister Kondru Murali

దళితులపై దాడులు జరుగుతుంటే.. కూడా చూసి ఏమీ చేయలని మంత్రులను తోలు తీయండి అని కేవిపిఎస్ సంఘం అంటుంది. లక్ష్మీంపేటలో దళితులను హత్య చేసిన వారిని అరెస్టు చేయాలని డిమాండ్‌ చేసిన దళిత సంఘాల నాయకుల తోలు తీస్తామని మంత్రి కొండ్రు మురళీ వ్యాఖ్యానించడాన్ని కులవివక్ష వ్యతిరేక పోరాట సంఘం(కెవిపిఎస్‌) తీవ్రంగా ఖండించింది. మంత్రికి ఏమాత్రం చిత్త శుద్ధి ఉన్నా దళితులను హత మార్చిన హంతకుల తోలు తీయాలని డిమాండ్‌ చేసింది. ఈ మేరకు కెవిపిఎస్‌ రాష్ట్ర ప్రధాన కార్యదర్శి జాన్‌వెస్లి ప్రకటన విడుదల చేశారు. కాంగ్రెస్‌ పార్టీకి చెందిన పెత్తందార్లు ఐదుగురు దళితులను వెంటాడి హత్యచేస్తే, సొంత పార్టీ నాయకులు నిందితులను కాపాడుతుంటే దళితుడై ఉండి కూడా ఏమీ చేయలేని కొండ్రుకు మంత్రి పదవి ఎందుకు? రాజీనామా చేయాలంటూ కెవిపిఎస్‌, ఇతర దళిత సంఘాల నాయకులు చేసిన సూచనపై మంత్రి ఆగ్రహించడం శోచనీయమన్నారు. పెత్తందారులా మారి దళితులపై ఎదురు దాడి చేసే బదులు స్వేచ్ఛగా తిరుగుతున్న ప్రధాన నిందితులను అరెస్టు చేయించాలన్నారు. ఆ భూమిని దళితులే సాగు చేసుకునే అవకాశం కల్పించేందుకు కృషి చేయాలని జాన్‌వెస్లీ మంత్రికి హితవు పలికారు.