Posted: 06/02/2012 07:14 PM IST

గత జన్మలో హత్యలు, అత్యాచారాలు చేసిన వారు ఈ జన్మలో పోలీసులవుతారా? గత జన్మలుంటాయని పోలీసులు నమ్ముతారా? పోలీసులను తీర్చిదిద్దే రాష్ట్ర పోలీసు అకాడమీ(అప్పా)లో ఇలాంటి ఆసక్తికర చర్చ జరిగింది. రాష్ట్ర హైకోర్టు ప్రధాన న్యాయమూర్తి జస్టిస్ మదన్ బీ లోకూర్ సమక్షంలోనే ఈ చర్చ జరగడం పోలీసు ఉన్నతాధికారులను సైతం విస్మయానికి గురిచేసింది. చిన్న చిన్న కేసుల్లో కోర్టు వెలుపల ‘ముందస్తు రాజీ’ అంశంపై పోలీసుశాఖలో అవగాహన కల్పించేందుకు అప్పాలో ప్రత్యేక సదస్సు నిర్వహించారు. ఆ సదస్సుకు జస్టిస్ మదన్ బీ లోకూర్ ముఖ్య అతిథిగా హాజరయ్యారు.

సదస్సు అనంతరం జస్టిస్ లోకూర్, డీజీపీ వి.దినేష్‌రెడ్డిలతోపాటు అదనపు డీజీలు, ఐజీలు, ఎస్పీలు, శిక్షణలో ఉన్న ఐపీఎస్‌లు ఒకేసారి భోజనానికి కూర్చున్నారు. జస్టిస్ లోకూర్ ఎదురు వరుసలో కూర్చున్న అదనపు డీజీ తేజ్‌దీప్ కౌర్ మీనన్ ఈ ఆసక్తికరమైన చర్చకు నాంది పలికారు. ‘సార్ మీరు వచ్చే జన్మలో కూడా న్యాయమూర్తిగానే ఉండాలని నేను కోరుకుంటున్నాను’ అని జస్టిస్ లోకూర్‌ను ఉద్దేశించి ఆమె అన్నారు. ‘ఈ వృత్తి లో నాకు చాలా సంతృప్తి ఉంది. కచ్చితంగా వచ్చే జన్మలోనూ న్యాయవ్యవస్థలోనే ఉండాలని నేనూ కోరుకుంటున్నాను’ అని జస్టిస్ లోకూర్ తడుముకోకుండా సమాధానమిచ్చారు. అంతటితో చర్చ ఆగిపోతే బాగుండేది. కానీ, తేజ్‌దీప్ కౌర్ మీనన్ మళ్లీ జోక్యం చేసుకుని ‘‘ గత జన్మలో హత్యలు, అత్యాచారాలు చేసివుంటాం. అందుకనే ఈ జన్మలో మేము పోలీసు ఉద్యోగాల్లోకి వచ్చాం’’ అని అన్నారు.

దీంతో ఒక్కసారిగా కలకలం రేగింది. ‘ఆ వ్యాఖ్యలను నేను తీవ్రంగా వ్యతిరేకిస్తున్నాను’ అంటూ సీఐడీ అదనపు డీజీ రమణమూర్తి ఆమె వ్యాఖ్యలకు అడ్డు తగిలారు. ‘గత జన్మలో అకృత్యాలు చేయడం వల్ల పోలీసు ఉద్యోగాల్లోకి వచ్చామని నేను భావించడంలేదు. పోలీసుశాఖలోకి రావడం చాలా ఉన్నతమైనదిగా నేను విశ్వసిస్తున్నాను’ అని అన్నారు. దీంతో శిక్షణలో ఉన్న ఐపీఎస్‌లు కూడా ఆయనకు మద్దతు పలికారు. ‘ఐబీఎంలో ఉద్యోగాన్ని వదులుకుని మరీ ప్రజలకు సర్వీసు చేసేందుకు నేను ఐపీఎస్‌కు వచ్చాను’ అని శిక్షణలో ఉన్న ఒక ప్రొబేషనరీ స్పష్టంచేశారు. ‘పోలీసుశాఖలో ఉంటూ వృత్తి గురించి ఇంత తక్కువగా మాట్లాడటమేమిటి..? పోలీసు అధికారులుగా ఉండి గత జన్మలపై నమ్మకమేమిటి..?’’ అంటూ మరికొందరు ప్రొబేషనరీలు ప్రశ్నలు సంధిం చారు. చివరికి డీజీపీ దినేష్‌రెడ్డి జోక్యం చేసుకున్నప్పటికీ ఆ చర్చకు తెరపడలేదు. ఆఖరికి జస్టిస్ లోకూర్ జోక్యం చేసుకుని.. ‘ఎలా పడితే అలా మాట్లాడుకోవడానికి మనం చిన్న పిల్లలం కాదు’ అంటూ సున్నితంగా చురకలంటించడంతో అందరూ నిశ్శబ్దంగా ఉండిపోయారు.