Posted: 06/02/2012 07:08 PM IST

వైయస్సార్ కాంగ్రెస్ పార్టీ గౌరవ అధ్యక్షురాలు వైయస్ విజయమ్మ పై రాజ్యసభ్య సభ్యుడు చిరంజీవి తీవ్ర స్థాయిలో విరుచుకు పడ్డారు, 'తల్లీ... ఈ రోజు నీ కొడుకును అరెస్ట్ చేశారని ఆవేదన వ్యక్తం చేస్తున్నావు, ఒక తల్లిగా నీ బాధలో అర్థం ఉంది. అయితే ఆ రోజు పచ్చటి పొలాలను గుంజుకుని సెజ్‌లకు ఇచ్చినప్పుడు ఎన్ని వేలమంది తల్లులు కడుపుకోతకు గురయ్యారు? ఆ వేదన నీకు వినిపించలేదా, ఆ కన్నీళ్లు నీకు కనిపించలేదా తల్లీ..' అని చిరంజీవి వైఎస్ విజయలక్ష్మిని ప్రశ్నించారు. అవినీతిని, ఉపఎన్నికలను ఒకటిగా చూడకూడదని, వేరువేరుగా చూడాలని కోరారు. వైఎస్ హ యాంలో అవసరాలకు మించి, చట్టాలను అతిక్రమించి, వెయ్యి ఎకరాలు అవసరం అనుకున్న చోట 10వేల ఎకరాలు, 10 వేలు అవసరం అనుకున్నచోట 20 వేల ఎకరాల పచ్చని పొలాలను లాక్కొని ఎంతోమంది బతుకులు బుగ్గిపాలు చేశారు.

మీ కొడుకు నిర్మించుకు న్న అవినీతి సామ్రాజ్యం వెనుక ఎంతమంది తల్లుల బతుకులు బుగ్గిపాలయ్యాయో కనిపించలేదా అమ్మా అని ప్రశ్నించారు. వాన్‌పిక్ పేరుతో పోలీసులను పెట్టి 80 గ్రామాలను రాత్రికి రాత్రి బలవంతంగా ఖాళీ చేసినప్పుడు ఆ తల్లుల ఆక్రోశం మీ చెవిన పడలేదా అని ప్రశ్నించారు. తన భూమిని లాకున్నప్పుడు శ్రీరాములు అనే రైతు ఆ పొలం వద్దే గుండె పగిలి చనిపోయినప్పుడు ఆ కుటుంబం పెట్టిన కన్నీళ్లు మిమ్మల్ని కరిగించలేకపోయాయా అని చిరంజీవి ప్రశ్నించారు. 'చేసిన తప్పును కప్పిపుచ్చుకోవడం కోసం తప్పుడు ఆరోపణలు చేయడం మీ స్థాయికి తగదని మనవి చేసుకుంటున్నా' అని విజయలక్ష్మిని ఉద్దేశించి చిరంజీవి అన్నారు. వైఎస్ మృతి కేవలం ప్రమాదమేనని సీఐడీ, కేంద్ర నిజనిర్ధారణ కమిటీ నిగ్గు తేల్చాయని చిరంజీవి గుర్తు చేశారు.