ITEMVIDEOS: నీటి కుక్కలను రోడ్డు దాటేందుకు.. రద్దీ రోడ్డుపై ట్రాఫిక్ నిలిపివేత..

Posted: 03/15/2022 09:29 PM IST

నీటి కుక్కలు.. ఈ పదమే మనకు కాసింత కొత్తగా అనిపిస్తోంది. భూమి మిద తిరిగే కుక్కలు మనకు తెలుసుకానీ.. నీటిలోనూ కుక్కలు ఉంటాయా.? అన్న ఆశ్చర్యం కూడా కొందరిలో వ్యక్తంకాక మానదు. అయితే విదేశాలు అందులోనూ సింగపూర్ వంటి దేశాలు పర్యటించిన వారికి మాత్రం ఇవి బాగానే తెలుసు. ఎందుకంటే అక్కడ నీటి కుక్కలు సహజంగా కనిపిస్తుంటాయి. కానీ మన వద్ద మాత్రం విశ్వాసపాత్రమైన గ్రామసింహాలే దర్శనమిస్తుంటాయి. మన దేశంలో ఈ వీధి శునకాలు రద్దీ రోడ్డు క్రాస్ చేయాలంటే.. ప్రాణాలను అరచేతిలో పెట్టుకోవాల్సిందే.

అలాగే సింగ‌పూర్ లోనూ రద్దీగా ఉండే రోడ్డును అక్కడి నీటికుక్కలు దాటాల్సివచ్చింది. ఇస్తానా ప్రాంతంలో ఈ ఘటన జరిగింది. నిత్యం రద్దీగా వుంటే రోడ్డుపైకి అవి ఒక్కసారిగా వచ్చాయి. వాటిని చూసిన పోలీసులు.. అవి ఎక్కడికో వెళ్లాలని రోడ్డు వెంట వచ్చాయని గ్రహించాడు. అయితే రోడ్డుపై రద్దీగా వెళ్తున్న వాహనాల మధ్య అవి వెళ్లలేవని.. వెళ్లినా ప్రమాదాల బారిన పడే అవకాశాలు వున్నాయని తెలుసుకున్న పోలీసులు.. వెంట‌నే రోడ్డుపై వెళ్తున్న ట్రాఫిక్‌ను నిలిపేశారు. నీటి కుక్కలు రోడ్డు దాటేవ‌ర‌కూ ట్రాఫిక్‌ను నిలిపేసి మాన‌వ‌త్వాన్ని చాటారు.

ఈ వీడియో సోష‌ల్‌మీడియాలో వైరల్ అవుతోంది. ట్రాఫిక్ పోలీసుల‌పై ప్ర‌శంస‌ల జ‌ల్లు కురుస్తోంది. ఈ వీడియోలో మ‌ల్టీలేన్ రోడ్డుకిరువైపులా వాహ‌నాలు నిలిచిపోయాయి. ఓ ట్రాఫిక్ పోలీసు రోడ్డు మ‌ధ్య‌లో నిల్చుండ‌గా 16 నీటికుక్క‌లు సుర‌క్షితంగా రోడ్డు దాటాయి. ఈ స‌న్నివేశాన్ని డబుల్ డెక్కర్ బస్సులో ప్రయాణిస్తున్న ఓ వ్య‌క్తి వీడియో తీసి, సోష‌ల్‌మీడియాలో పెట్టాడు. ఈ వీడియోను సింగ‌పూర్ ప్ర‌ధాన‌మంత్రి లీ హ్సీన్ లూంగ్ షేర్ చేశారు. ట్రాఫిక్ పోలీసుల‌ను అభినందించారు.

Our local otters have been dropping in on the Istana. Appreciate the care by Istana staff, @nparksbuzz, @SingaporePolice and members of public to help them co-exist with us safely in our urban environment, e.g. crossing the road safely. – LHL https://t.co/H8jGiAmTLB pic.twitter.com/j0lzTZIiyU

— leehsienloong (@leehsienloong) March 11, 2022