ట్రాయ్ నిర్ణయాన్ని స్వాగతిస్తున్న మొబైల్ ఫోన్ ప్రీపెయిడ్ యూజర్లు

Posted: 01/28/2022 10:35 AM IST

మొబైల్ ఫోన్ వినియోగదారులు టెలికం నియంత్రణ సంస్థ ట్రాయ్ తీసుకున్న నిర్ణయాన్ని పూర్తిగా సమర్థిస్తున్నారు. ఈ కోత్త సంవత్సరంలో తొలిసారిగా ట్రాయ్ తీసుకున్న నిర్ణయం మొబైల్ ఫోన్ వినియోగదారులకు ఒకింత గుడ్ న్యూస్ మాదిరిగానే వుంది. మరీ ముఖ్యంగా ప్రీపెయిడ్ మొబైల్ యూజర్లకు ఇది కలిసివచ్చే అంశం. ఎందుకంటే  ప్రీపెయిడ్ ప్యాక్ వ్యాలిడిటీ విషయంలో ట్రాయ్ సరికొత్త నిబంధన తీసుకురావడమే కాదు టెలికాం సర్వీసు అందించే సంస్థలన్నీ దీనిని ఖచ్చితంగా అమలుపర్చాలని అదేశించింది. ఏంటా నిర్ణయం అని అలోచిస్తున్నారు కదూ. టెలికాం సర్వీసు అందించే సంస్థలు అన్ని ఇకపై నెల రోజుల కాలపరిమితితో ఒక ప్లాన్ ఉండేలా తప్పనిసరిగా చేసుకోవాలని అదేశాలు జారీ చేసింది

అదేంటి ఇప్పటికే టెలికాం సంస్థలు ఈ నెలసరి మంత్లీ ప్లాన్ అందుబాటులోకి తీసుకువచ్చాయి కదా., అంటారా.? గతంలో ప్రీపెయిడ్ ప్యాక్‌లు 30 రోజుల కాలపరిమితితో లభ్యమయ్యేవి. అయితే, ఆ తర్వాత వీటిని అన్ని టెలికం సంస్థలు 28 రోజులకు తగ్గించేశాయి. ఫలితంగా సంవత్సరానికి 13 సార్లు రీచార్జ్ చేసుకోవాల్సి వస్తోంది. వినియోగదారులకు ఇది భారంగా మారుతోంది. ఈ నేపథ్యంలో ఇకపై ప్రతి సంస్థ 30 రోజుల కాలపరిమితితో ప్రీపెయిడ్ రీచార్జ్ ప్యాక్‌‌లను తీసుకురావాలని ఆదేశించింది. ఇందులో ప్లాన్ ఓచర్, ఒక స్పెషల్ టారిఫ్ ఓచర్, కాంబో వోచర్‌లు ఉండాలని స్పష్టం చేసింది. ప్రతి నెల ఒకే తేదీన వీటిని రీచార్జ్ చేసుకుంటే సరిపోయేలా ఉండాలని ఆదేశించింది. అంతేకాదు, రెండు నెలల్లోపు తమ ఆదేశాలను అమలు చేయాలని ఆదేశించింది.