అమెరికా పెంటగాన్ వద్ద కాల్పుల కలకలం.. లౌక్ డౌన్ అమలు..

Posted: 08/03/2021 10:16 PM IST

 అగ్రరాజ్యం అమెరికా రక్షణశాఖ ప్రధాన కార్యాలయం పెంటగాన్ వద్ద తుపాకీ కాల్పుల కలకలం రేగింది. పెంటగాన్ సమీపంలోని మెట్రో రైల్వేస్టేషన్ లో తుపాకీ కాల్పుల శబ్దాలు పలుమార్లు వినిపించాయి. ఈ నేపథ్యంలో వేగంగా స్పందించిన ఆర్మీ అధికారులు అగ్రరాజ్య మిలటరీ ప్రధాన కార్యాలయాల వద్ద లాక్ డౌన్ విధించారు. వాషింగ్టన్ శివారు ప్రాంతమైన అర్లింగ్టన్ వద్దనున్న పెంటగాన్ ప్రధాన కార్యాలయానికి ప్రతి రోజు వేల సంఖ్యలో ఉద్యోగులు వస్తుంటారు. వారందరి సౌలభ్యం కోసం ఏర్పాటు చేసిన డజన్ల అడుగుల దూరంలోని మెట్రోస్టేషన్ లో కాల్పులు కలకలం రేపాయి.

అయితే కాల్పుల నేపథ్యంలో ఉద్యోగులతో పాటు స్టేషన్లో వున్నవారందరూ ఎక్కడి వారు అక్కడే తలదాచుకోవాలని కోరిన అధికారులు హుటాహుటిన స్పందించిన లాక్ డౌన్ విధించారు. స్టేషన్ లోని ప్రయాణికులతో పాటు ఉద్యోగులు సురక్షితంగా ఆ ప్రాంతాన్ని వీడాలని కూడా అధికారులు కోరారు. భారీ ఎత్తున పోలీసు బలగాలు రంగంలోకి దిగి ప్రయాణికులను తరలిస్తున్నాయి. మెట్రో బస్ ఫ్లాట్ ఫాం వద్ద గుర్తు తెలియని వక్తులు పలు రౌండ్ల కాల్పులకు తెగబడినట్లు సమాచారం.

ఈ ఘటనపై పెంటగాన్ ఫోర్స్ ప్రొటెక్షన్ ఏజెన్సీ ప్రతినిధి క్రిస్ లేమన్ మాట్లాడుతూ..కాల్పులు కొనసాగుతున్నట్లు చెప్పాడు. ఆ ప్రాంతం గుండా ప్రయాణించవద్దని ప్రజలను ఆయన హెచ్చరించాడు. అయితే కాల్పులకు గల కారణాలు ఏమిటీ..? ఎవరు కాల్పులు జరిపారు.. ఈ కాల్పుల్లో ఎంతమంది గాయాలపాలయ్యారు.? అన్న వివరాలు తెలియలేదు. ఈ ఘటనకు సంబంధించి పూర్తి వివరాలు తెలియాల్సి ఉంది. కాగా ఇది ఉగ్రవాద చర్య అన్న విషయమై కూడా క్లారిటీ రావాల్సి వుంది.