గంగులపై ఈటెల ఫైర్.. అధికారం ఎవరికీ శాశ్వతం కాదు

Posted: 05/18/2021 08:49 PM IST

Etela rajender warns minister gangula kamalakar over targeting huzurabad activists

మాజీ మంత్రి ఈటెల రాజేందర్ ను మంత్రివర్గం నుంచి బర్తరప్ చేసిన ఆయన ఇలాకాలో టీఆర్ఎస్ పార్టీ నిట్టనిలువునా చీలిపోయింది. ఆయనతో సన్నిహితంగా మెలిగిన వర్గాలకు ఆయన వెంటే వుంటూ తమ స్వామిభక్తిని చాటుకోగా, పార్టీలో ఆయన వర్గం వెళ్లిపోవడంతో ఇప్పుడైనా తమకు సముచితస్థానం దక్కుతుందని అశిస్తున్న క్రియాశీలక నేతలకు మధ్య పోరపచ్చాలు కూడా వచ్చేశాయి, అయితే ఆయన ఉద్వాసనకు గురైన నేపథ్యంలో ఇక పార్టీని ముందుకు నడిపే నాయకుడు ఎవరన్న విషయంలో పార్టీ కార్యకర్తలు నిరాశ, నిసృహలకు లోను కాకుండా టీఆర్ఎస్ వేగంగా పావులు కదుపుతోంది.

తెలంగాణ మాజీ ఆరోగ్య శాఖా మంత్రి ఈటల రాజేందర్ స్వరం పెంచారు. పరోక్షంగా తెలంగాణ ముఖ్యమంత్రి కేసీఆర్ పై విమర్శల దాడి చేసిన ఆయన తన నియోజకవర్గంలోని తన అనుచరులను టార్గెట్ చేస్తున్న బిసి సంక్షేమ శాఖా మంత్రి గంగుల కమలాకర్ పై తీవ్రస్థాయిలో ధ్వజమెత్తారు, తెలంగాణ ప్రభుత్వంతో పాటు..సీఎం కేసీఆర్ పైన కూడా విమర్శలు కొనసాగించారు. తనపై కక్ష కట్టి కావాలని తనను టార్గెట్ చేసి ఇబ్బందులకు గురిచేశారనీ.. అయినా తన పని తాను చేసుకుంటూ భవిష్యత్ ప్రణాళికలో భాగంగా పలువురు పార్టీ నేతలను కలుస్తున్నానని, అయితే తన పనికి విఘాతం కల్పించడమే లక్ష్యంగా ప్రభుత్వం పెద్దలు తనను ఇంకా ఇబ్బందులకు గురిచేయాలని ప్రయత్నిస్తున్నారని ఆయన అన్నారు,

తనను ఇబ్బంది పెట్టిన పట్టించుకోలేదని,, తన పని తాను చేసుకుంటూ ముందుకు వెళ్తుండటంతో.. ఇక తాజాగా రూటు మార్చి తనవారిని కూడా ఇబ్బందులు పెడుతున్నారని అన్నారు. తన నియోజకవర్గ ప్రజలను కూడా ఇబ్బందులకు గురిచేస్తున్నారని దీనిన ఎట్టి పరిస్థితుల్లో సహించబోనని ఈటెల హెచ్చరించారు. తన ప్రజలను తనవారిని తన మద్దతుదారులను సమస్యలకు గురిచేస్తే సహించబోనని ఈటెల వార్నింగ్ ఇచ్చారు. అధికారంలో ఉన్నారు కదాని ఇష్టమొచ్చినట్లు చేస్తున్నారనీ.. కానీ అధికారం ఎవ్వరికీ శాశ్వతం కాదని తెలుసుకోవాలని సూచించారు. ఈ సందర్బంగా మంత్రి గంగుల కమాలాకర్ పై తీవ్రస్థాయిలో ఈటెల ఫైర్ అయ్యారు.

‘‘బిడ్డా గంగులా... నువ్వు ఎన్ని ట్యాక్సులు ఎగ్గొట్టావో ఎవరికి తెలియదు?, నీ కథ మొత్తం నాకు తెలుసని... సమయం వచ్చినప్పుడు అన్నీ బయటపెడతానని... 2023 తర్వాత నీవు ఉండవని’’ తీవ్ర హెచ్చరికలు జారీ చేశారు. కరీంనగర్ సంపదను విధ్వంసం చేసి, జిల్లాను బొందలగడ్డగా మార్చావని ఈటల దుయ్యబట్టారు. పైరవీలు చేసుకుని మంత్రి అయిన చరిత్ర నీదని... ఇలాంటి చరిత్ర తనది కాదని అన్నారు. గంగుల లాంటి వ్యక్తుల బెదిరింపులకు తాను భయపడనని చెప్పారు. మంత్రిగా ఉన్న తర్వాత సభ్యత, సంస్కారం ఉండాలని అన్నారు. హుజూరాబాద్ ప్రజలను నువ్వు వేధిస్తున్నావంటూ విరుచుకుపడ్డారు.