తిరుమలపై కరోనా కలకలం.. శ్రీవారి ఆలయ మాజీ ప్రధానార్చకుడి మృతి

Posted: 07/20/2020 02:56 PM IST

దేశంలో కరోనా వైరస్‌ విజృంభణ కొనసాగుతుంది. అక్కడి, ఇక్కడ అన్న తేడా లేకుండా ఎక్కడబడితే అక్కడకు చోచ్చుకెళ్తోంది. లాక్ డౌన్ విధింపుతో సుమారు 80 రోజుల పాటు భక్తుల తాకిడి లేకుండా వెలవెలబోయిన కలియుగ వైకుంఠంలో అన్ లాక్ 1.0 మార్గదర్శకాలతో ప్రత్యక్ష దైవం శ్రీవారి దర్శనానికి ద్వారాలు తెరుచుకున్నాయి. ఈ తరుణంలో పవిత్ర కోండపై కరోనా కలకలం రేగింది. కలియుగ దైవం తిరుమల శ్రీవారి ఆలయ మాజీ ప్రధాన అర్చకులు శ్రీనివాసమూర్తి దీక్షితులు కరోనా కారణంగా ఇవాళ ఉదయం (75) కన్నుమూశారు. గత కొద్ది రోజుల క్రితం ఆయన వైరస్‌ బారిన పడ్డారు.

తిరుపతిలోని తితిదే కొవిడ్‌ ఆసుపత్రిలో చికిత్స పొందుతూ ఇవాళ తెల్లవారుజామున కన్నుమూశారు. శ్రీవారి ఆలయ ప్రధాన అర్చకుడిగా దాదాపు 20 ఏళ్లు సేవలు అందించిన ఆయన కరోనా బారిన పడి తుదిశ్వాస విడిచారు. శ్రీనివాసమూర్తి దీక్షితులకు ఆలయం సంప్రదాయం ప్రకారం అంతిమ సంస్కారాలు నిర్వహించాల్సి ఉంది. కానీ, కరోనా వైరస్‌ వ్యాప్తి నేపథ్యంలో కేంద్ర ప్రభుత్వం నిబంధనల మేరకు మృతదేహాన్ని కుటుంబ సభ్యులకు కూడా అప్పగించే అవకాశం లేదని అధికారులు చెబుతున్నారు.