‘నిర్భయ’ కేసు: నాలుగో సారి డెత్ వారెంట్ జారీ.!

Posted: 03/05/2020 03:25 PM IST

Nirbhaya case delhi court fixes mar 20 as date of execution of 4 convicts

దేశరాజధాని ఢిల్లీలోని పుర వీధుల్లో కదులుతున్న బస్సులో ఓ అమాయక అడపడచుపై దారుణఘాతుకం జరిగి ఏడేళ్లు కావస్తున్నా ఇంకా ఈ కేసులో బాధితురాలి కుటుంబానికి న్యాయం జరగలేదు. యావత్ దేశాన్ని కదిలించిన ఈ హత్యాచార కాండపై దేశవ్యాప్తంగా తీవ్రస్థాయిలో నిరసనలు పెల్లుబిక్కిన క్రమంలో దేశసర్వోన్నత న్యాయస్థానం సుప్రీంకోర్టు.. ఢిల్లీ హైకోర్టు న్యాయం కోసం వేచిచూస్తున్న బాధితురాలి కుటుంబసభ్యులకు అండగా నిలబడ్డాయి. అయితే దోషుల తరుపు న్యాయవాదులు మాత్రం ఈ కేసులో బాధితురాలికి న్యాయం దక్కకుండా.. ఈ కేసులో జాప్యాల మీద జాప్యాలు జరిగేలా న్యాయరంగంలోని లోసుగులకు పనిపెడుతున్నారు.

ఈ నేపథ్యంలో మూడు పర్యాయాలు ఢిల్లీలోని పటియాల కోర్టు విడుదల చేసిన డెత్ వారెంట్.. వాయిదా పడటంతో.. ఈ సారి దోషులకు శిక్షను విధించే డెత్ వారెంట్.. మరణశిక్షను అమలుపర్చేదిగా వుండాలే కానీ.. వాయిదా పడేది కాకూడదని బాధితురాలి తల్లి ఆశాధేవి న్యాయస్థానాన్ని ఇటీవల న్యాయస్థానం డెత్ వారెంట్ పై స్టే విధించిన సందర్భంలో కోరారు. ఈ క్రమంలో తాజాగా ఢిల్లీలోని పటియాల కోర్టు నిర్భయ హత్యాచార కేసులో డెత్ వారెంట్ జారీ చేసింది. మార్చి 20 శుక్రవారం రోజున దోషులకు ఉరి శిక్ష విధించాలని న్యాయస్థానం తాజా అదేశాలను జారీ చేసింది.

ఇదివరకే ఈ కేసులో నలుగురు దోషులు అన్ని న్యాయపరమైన హక్కులను వినియోగించుకున్నారు. తాజాగా దోషుల్లో ఒకడైన పవన్‌ కుమార్‌ గుప్తా వేసిన క్యురేటివ్‌ పిటిషన్ ను సర్వోన్నత న్యాయస్థానం సుప్రీంకోర్టు తిరస్కరించడంతో.. వెనువెంటనే రాష్ట్రపతికి క్షమాబిక్ష పిటీషన్ పెట్టుకున్నాడు. కాగా మరోమారు రాష్ట్రపతి క్షమాబిక్ష పిటీషన్ ను దోషి పవన్ సర్వోన్నత న్యాయస్థానంలో రివ్యూపిటీషన్ దాఖలు చేయవచ్చు. అయితే ఇదే తరహాలో వినయ్ శర్మ కూడా రాష్ట్రపతి క్షమాబిక్ష పిటీషన్ పై.. సుప్రీంకోర్టులో క్యురేటివ్ పిటీషన్ దాఖలు చేసినా.. అందులో కొత్తదనమేమీ లేదని న్యాయస్థానం కొట్టివేసింది. మరి నిర్భయ కేసులో తాజాగా జారీ చేసిన డెత్ వారెంట్ చిట్టచివరిదవుతుందా.? లేదా.. అన్నది వేచి చూడాల్సిందే.