అరుణ్ జైట్లీ ఆరోగ్యం మరింత విషమం.. ఎయిమ్స్ కు బీజేపి నేతలు

Posted: 08/18/2019 12:11 AM IST

కేంద్ర మాజీ మంత్రి, బీజేపీ నేత అరుణ్ జైట్లీ ఆరోగ్యం మరింత విషమించింది. ఆయన కిడ్నీలు, ఊపిరితిత్తులు కూడా సక్రమంగా పనిచేయడం లేదని వైద్యులు అంటున్నారు. పరీక్షలు నిర్వహించి ఆయన అవయవాలు ఎలా పనిచేస్తున్నాయో పరిశీలిస్తున్నామని చెబుతున్నారు. కాగా, ప్రస్తుతం ఆయన్ను లైఫ్ సపోర్ట్ వ్యవస్థపై ఉంచినట్లు ఢిల్లీ ఎయిమ్స్ వైద్యులు తెలిపారు. జైట్లీకి ఈసీఎంఓ(ఎక్స్‌ట్రా కార్పోరియల్‌ మెంబ్రాన్‌ ఆక్సిజనేషన్‌)ను అమర్చినట్లు వెల్లడించారు.

తనంతట తానుగా శ్వాస తీసుకోవడం వీలుకాకపోవడంతో ఈ వ్యవస్థను అమర్చామని చెప్పారు. సాధారణంగా కిడ్నీలు, గుండె పనితీరు మందగించినప్పుడు, శ్వాస తీసుకోలేకపోయినప్పుడు ఈసీఎంఓను ఉపయోగిస్తారు. మరోవైపు కేంద్ర మంత్రి హర్షవర్ధన్‌, మరో కేంద్రమంత్రి పియూష్ గోయల్, బిహార్ ముఖ్యమంత్రి కాంగ్రెస్‌ సీనియర్‌ నేత అభిషేక్ మను సింఘ్వి ఎయిమ్స్‌కు చేరుకుని జైట్లీ ఆరోగ్య పరిస్థితి గురించి వాకబు చేశారు.

ఇప్పటికే అరుణ్ జైట్లీని రాష్ట్రపతి రామ్ నాథ్ కోవింద్, హోంమంత్రి అమిత్ షా, బీజేపి అగ్రనేతలు, పలువురు కేంద్రమంత్రులు పరామర్శించారు. వారు వైద్యులతో అరుణ్ జైట్లీ అరోగ్య పరిస్థితిపిై ఆరా తీశారు. కాగా ఎయిమ్స్ వైద్యులు మాత్రం అరుణ్ జైట్లీ అసుపత్రిలో శ్వాసతీసుకోవడంలో ఇబ్బందులు ఎదుర్కొంటూ  అగస్టు 9న అసుపత్రిలో చేరినప్పటి నుంచి ఆయన అరోగ్య పరిస్థితిపై ఎలాంటి హెల్త్ బులిటెన్ విడుదల చేయలేదు.