యువతిని వేధించి, దాడి చేసిన కేసులో నటుడు అరెస్ట్

Posted: 08/13/2019 11:46 AM IST

సమాజంలో పేరు ప్రతిష్టలు వున్న పెద్దలు వారి వ్యక్తిగత జీవితాల్లోని విషయాలను బయటకు ప్రపంచానికి తెలియకుండా చూసుకోవాలని భావించడం సహజం. కానీ తమను అభిమానించే అభిమానులు వున్నారన్న తరుణంలో తాము తెలిసి ఏ తప్పు చేయకూడదని మాత్రం భావించరు. అసలు తమకు సంబంధించిన విషయాలు బాహ్య ప్రపంచంలోకి వచ్చినా ఇబ్బంది లేదన్నట్లుగా వ్యవహరించరు. అదే అనర్థాలకు కారణమవుతుంది. ఫలితంగా సెలబ్రిటీ స్టేటస్ కూడా క్రమంగా కనుమరుగవుతుంది.

తాజాగా అలాంటి వ్యవహారంలో ఇక ఓ యువతిని లైంగికంగా వేధించడంతో పాటు, ఆమెపై చెయ్యి చేసుకున్న కేసులో టీవీ నటుడు అభినవ్ కోహ్లీని అరెస్ట్ చేసినట్టు ముంబై పోలీసులు వెల్లడించారు. నగర పరిధిలోని సమతా నగర్ పోలీస్ స్టేషన్ కు తన తల్లితో కలిసి వచ్చిన బాధితురాలు ఇచ్చిన ఫిర్యాదు మేరకు విచారణ జరిపి అభినవ్ ను అదుపులోకి తీసుకున్నామని, ఆమె కూడా నటేనని తెలిపారు.

తనను దారుణంగా తిట్టడంతో పాటు, అసభ్యకరంగా ఉన్న మోడల్స్ ఫోటోలను తనకు నిత్యమూ చూపించి, కోరిక తీర్చమని బలవంతం పెట్టేవాడని సదరు నటి ఫిర్యాదు చేసిందని తెలిపారు. దీంతో అభినవ్ పై ఐపీసీ సెక్షన్ 354-ఏ, 323, 504, 506 కింద కేసును రిజిస్టర్ చేశామని, అతన్ని స్థానిక కోర్టులో ప్రవేశపెట్టి, పోలీసు కస్టడీకి తీసుకున్నామని, తదుపరి విచారణ కొనసాగుతోందని వెల్లడించారు.