కులుమనాలిలో పారాష్యూట్ కూలి హైదరాబాదీ థెరపిస్ట్ మృతి

Posted: 08/10/2019 10:20 PM IST

హైదరాబాద్ యశోద ఆసుపత్రిలో పనిచేస్తున్న డాక్టర్ చంద్రశేఖర్ రెడ్డి విషాదకర రీతిలో కులూమనాలిలో ప్రాణాలు వదిలారు. హైదరాబాద్ లోని నాగోలు మోహన్ నగర్ ప్రాంతంలో నివసించే చంద్రశేఖర్ రెడ్డి ఓ వైద్యుడు. కొన్నిరోజుల క్రితం విహారయాత్ర నిమిత్తం హిమాచల్ ప్రదేశ్ లోని ప్రముఖ టూరిస్ట్ స్పాట్ కులుమనాలి వెళ్లారు.

అక్కడ పారాచ్యూట్ తో గాల్లో విహరించేందుకు చేసిన ప్రయత్నం విషాదాంతంగా మారింది. పారాచ్యూట్ గాల్లోకి లేచిన తర్వాత డాక్టర్ చంద్రశేఖర్ రెడ్డి దానిపై నియంత్రణ కోల్పోయారు. ఫలితంగా ఆయన గాల్లోంచి కిందపడిపోవడంతో బలమైన దెబ్బలు తగిలి మరణించారు. ఈ సమాచారం అందుకున్న ఆయన కుటుంబ సభ్యులు తీవ్ర విషాదంలో మునిగిపోయారు.

ప్రమాదం జరగడానికి కొద్ది గంటల ముందే చంద్రశేఖర్ తమకు ఫోన్ చేసి మాట్లాడారని కుటుంబసభ్యులు తెలిపారు. ఇంతలోనే ఈ విషాదం జరిగినట్లు సమాచారం వచ్చిందని చెప్పారు. కుటుంబానికి ఆధారంగా ఉన్న వ్యక్తి మరణించడంతో వారంతా కన్నీరు మున్నీరవుతున్నారు. చంద్రశేఖర్ మృతదేహాన్ని హైదరాబాద్ తరలించడానికి అతడి కుటుంబసభ్యులు ఏర్పాట్లు చేస్తున్నారు. కేంద్ర హోంశాఖ సహాయ మంత్రి కిషన్ రెడ్డిని కలిసి సాయం చేయాల్సిందిగా కోరారు.