ఉగ్రస్థావరాలపై విమానదాడులు.. నిర్థారించిన భారత్

Posted: 02/26/2019 01:15 PM IST

Govt confirms air strike by indian air force on pakistan terror camps

పాకిస్థాన్ లోని ఉగ్రవాద శిబిరాలపై వైమానిక దళం మెరుపు దాడి చేసినట్లు భారత్‌ ధ్రువీకరించింది. పూల్వామాలో జైషే మహమ్మద్ ఉగ్రవాదులు జరిపిన మానవబాంబు దాడిలో ఏకంగా 48 మంది భారత జవాన్లు అమరులైన నేపథ్యంలో అందుకు ప్రతీకారంగా భారత్ ఇవాళ వేకువజామున దాడులు జరిపింది. పాకిస్థాన్ లోని ఉగ్రస్థావరాలే లక్ష్యంగా ఈ దాడులు జరిపామని ఈ మేరకు దాడి వివరాలను భారత విదేశాంగశాఖ కార్యదర్శి విజయ్ గోఖలే మీడియా సమావేశంలో వెల్లడించారు.

ఈ సందర్భంగా ఆయన మాట్లాడుతూ.. పాకిస్థాన్ ప్రేరేపిత ఉగ్రవాద సంస్థ జైషే మహమ్మద్ గత రెండేళ్లుగా క్రియాశీలకంగా పనిచేస్తోందని.. బహావల్ పూర్‌ నుంచి వరుసగా ఉగ్రదాడులకు పాల్పడుతోందని అన్నారు. భారత్ లోని పలు ప్రాంతాల్లో ఆత్మాహుతి దాడులు చేపట్టేందుకు జైషే మహ్మద్‌ యత్నిస్తున్నట్లు నిఘా వర్గాల నుంచి పక్కా సమాచారం అందింది. ఇందుకోసం ఫిదాయిన్‌ జిహాదీలకు శిక్షణ కూడా ఇస్తున్నట్లు తెలిసింది. ఉగ్రవాదులకు గట్టిగా బుద్దిచెప్పడంతో పాటు భారత్ పై దాడులకు పాల్పడితే పర్యావసానం ఇలాగే వుంటుందని చెప్పేందుకు ఈ దాడులు జరిపామని చెప్పారు.

ఇవాళ తెల్లవారుజామున నిఘా వర్గాల నేతృత్వంలో ఆపరేషన్ చేపట్టామని చెప్పారు. జైషే మహమ్మద్ కు చెందిన అతిపెద్ద ఉగ్ర శిబిరమైన బాలకోట్ లో దాడి చేశామని చెప్పారు. ఈ ఆపరేషన్లో పెద్ద సంఖ్యలో జైషే ఉగ్రవాదులు, శిక్షకులు, సీనియర్‌ కమాండర్ లు, జిహాదీలను మట్టుబెట్టామన్నారు. ఈ ఉగ్రశిబిరం జైషే అధినేత మసూద్‌ అజార్‌ బంధువైన మౌలానా యూసఫ్‌ అజార్‌ అలియాస్‌ ఉస్తాద్‌ ఆధ్వర్యంలో నడుస్తోందని తెలిపారు. దట్టమైన అడవుల్లో ఉన్న ఈ శిబిరంలో ఉగ్రవాదులకు శిక్షణ ఇస్తున్నారని గోఖలే తెలిపారు.