ఫ్రిజ్డ్ తెరిస్తే.. బాంబై పేలింది.. రేపటి ఇంజనీరును బలిగొంది..

Posted: 12/28/2018 03:45 PM IST

Refrigerator blast kills engineering student in rangareddy of telangana

టైమ్ బాగోలేకపోతే తాడును పట్టుకున్నా అది పామై కరుస్తుందన్నట్లు.. ఆ విద్యార్థిని విషయంలోనూ అదే జరిగింది. విధి వక్రీకరించింది. ఇంట్లో వుంటూనే పరీక్షలకు సిద్దం అవుతున్న ఆ రేపటి ఇంజనీరు పాలిట ఇంట్లోని ఫ్రిడ్జి డోర్ శాపంగా పరిణమించింది. ప్రిడ్జి డోర్ తీయగానే అది బాంబై పేలి.. విద్యార్థిని ప్రాణాలను బలితీసుకుంది. రంగారెడ్డి జిల్లాలోని ఇబ్రహీంపట్నం మండల పరిధిలోని బొంగులూరు గ్రామంలో ఈ విషాద ఘటన జరిగింది.

వివరాల్లోకి వెళ్తే.. ఇబ్రహీంపట్నం మండలం బొంగులూరుకు చెందిన మనోహర్, లావణ్యల పెద్ద కుమార్తె దీపిక బీటెక్ ఫస్టియర్ చదువుతోంది. తెలంగాణ అసెంబ్లీ ఎన్నికల ఫలితాల నేపథ్యంలో ఈ నెల 10న జరగాల్సిన మాధ్స్ పేవర్ 1ను ఈ నెల 31కి జేఎన్టీయూ అధికారులు పోస్టుపోన్ చేశారు. దీంతో మాథ్స్ పరీక్ష కోసం ఇంట్లోనే వుండి ప్రిపేర్ అవుతన్న దీపిక.. తల్లిదండ్రులిద్దరూ ఉద్యోగాలకు, చెల్లెలు పాఠశాలకు వెళ్లిన తరువాత చదుపుకుంటుంది.

అయితే ఇంట్లో ఎవరూ లేకపోవడంతో.. తనకు దాహం వేయడంతో దీపిక ప్రీడ్జి డోర్ తీసింది. డోర్ అలా తీయగా.. ఒక్కసారిగా పేలుడు సంభవించింది. ఈ పేలుడు దెబ్బకు దీపిక ఎగిరిపడింది. ఆమెకు మంటలు అంటుకోవడంతో అక్కడికక్కడే చనిపోయింది. ఫ్రిజ్ పేలడంతో షార్ట్ సర్క్యూట్ జరిగి ఇంట్లో ఉన్న వస్తువులన్నీ చిందరవందరగా పడిపోయాయి. ఇంట్లో నుంచి పేలుడు శబ్ధం రావడంతో ఇరుగురుపొరుగువారు అక్కడికి పరుగులు తీశారు.

స్థానికులు ఇచ్చిన సమాచారంతో రంగంలోకి దిగిన ఫైర్ సిబ్బంది మంటల్ని అదుపు చేశారు. ఫ్రిజ్‌లోని కంప్రెసర్‌తో పాటూ సిలిండర్ పేలడం వల్లే ఘటన జరిగిందని అనుమానిస్తున్నారు. ఈ ఘటనపై కేసు నమోదు చేసిన పోలీసులు.. దీపిక మృతదేహాన్ని పోస్ట్‌మార్టమ్‌కు పంపించారు. ఇటు కూతురు మృతితో తల్లిదండ్రులు కన్నీరుమున్నీరవుతున్నారు. దీపిక తల్లిదండ్రులది నల్గొండ జిల్లా దేవరకొండ కాగా.. బొంగులూరులో ఇల్లు కట్టుకొని స్థిరపడ్డారు.