ITEMVIDEOS: తృటిలో ప్రమాదం నుంచి తప్పించుకున్న ‘‘కొత్తజంట’’

Posted: 07/10/2018 04:18 PM IST

పెళ్లంటే.. పెళ్లంటే పందిళ్లు సందళ్ళు చప్పెట్లు తాళాలు తలంబ్రాలు మూడే ముళ్ళు ఏడే అడుగులు మొత్తం కలిసి నూరేళ్లు.. అంటూ కొత్తగా పెళ్లైన ఓ నవవధూవరులు.. తమ పెళ్లి వీడియోను చిత్రీకరించేందుకు పార్కుకు వెళ్లగా వారికి భయానక అనుభవం ఎదురైంది. ఉదయం నుంచి జరిగిన సందడి, మిత్రులు, శ్రేయోభిలాషుల గ్రీటింగ్స్ అందుకున్న ఆ జంట.. వీడియో షూట్ లో పాల్గొంటూ పిచ్చపాటి మాట్లాడుకుంటున్న వారిని చెట్టు భయకంపితుల్ని చేసింది. అదేంటి అంటారా.? అందరూ ఆశీర్వదించారు.. నేను మాత్రం తక్కువ అంటూ ఓ చెట్టు కూడా అశీర్వధించింది.

అయితే ఈ కొత్త జంటపై అధిక ప్రేమ కనబర్చిన చెట్టు వారిపై ఏకంగా కొమ్మను వేసి మరీ అశీర్వదించే ప్రయత్నం చేయడంతో వారు భయాందోళనకు గురయ్యారు. కొమ్మ పడుతున్న శబ్దం వినిపించడంతో వారు అప్రమత్తమయ్యారు. దీంతో వారు తృటిలో ప్రమాదం బారి నుంచి తప్పించుకోగలిగారు. పార్కుకి వెళ్లి అక్కడి పచ్చని అందాల మధ్య వీడియో తీసుకోవాలనుకున్న జంటకు అనూహ్య ఘటన ఎదురైంది. కాగా, ఇందుకు సంబంధించిన వీడియో ప్రపంచ వ్యాప్తంగా వైరల్‌ అవుతోంది.

అమెరికాకు చెందిన చెయెన్నె, లుకాస్‌ జంట వైభవంగా పెళ్లి చేసుకుంది. వెడ్డింగ్ వీడియో షూట్‌లో పాల్గొంటూ ఓ చెట్టు కింద వారిద్దరూ కూర్చున్నారు. మొదట పెళ్లి కొడుకుకి చెట్టుపై నుంచి ఓ శబ్దం వినిపించింది. ఏంటా అని వారిద్దరూ పైకి చూసేసరికి ఓ కొమ్మ విరిగి తమపై పడుతున్నట్లు తెలిసింది. దీంతో ఆ క్షణమే అక్కడి నుంచి లేచి పరుగులు తీశారు. ఈ వీడియో టీజర్‌ను వారే సామాజిక మాధ్యమాల్లో పోస్ట్ చేశారు.