ప్రియుడి కోసం.. భర్తను హత్యచేయించిన నవవధువు

Posted: 05/08/2018 12:03 PM IST

విజయనగరం జిల్లాలో మరో స్వాతి తరహా కేసు నమోదైంది. పది రోజులు కూడా నిండకుండానే.. పసుపు పారణి అరకముందే కొత్త పెళ్లికొడుకు హత్యచేయబడిన ఘటన విజయనగరం జిల్లాలోని గురుగుబిల్లిలో కలకలం సృష్టించగా, ప్రియుడిని విడిచి వుండలేకే భర్త హత్యకు స్కేచ్ వేసి పక్కాగా అమలు చేయించింది నవ వధువు. సోమవారం రాత్రి నవజంట.. వ్యాహ్యాళికి వెళ్లగా, ఇద్దరు దుండగులు దాడి చేసి యువకుడిని దారుణంగా హత్య చేసిన కేసును పోలీసులు గంటల వ్యవధిలోనే ఛేదించారు. కాగా, వారి దర్యాప్తులో విస్తుపోయే నిజాలు వెలుగుచూశాయి.

వివరాల్లోకి వెళితే, శ్రీకాకుళం జిల్లా చిట్టిపూడివలస గ్రామానికి చెందిన యామక గౌరీశంకరావుకు, విజయనగరం జిల్లా కడెకళ్ల గ్రామానికి చెందిన సరస్వతికి గత నెల 28న పెద్దలు వివాహం జరిపించారు. వీరిద్దరూ బావా, మరదులే కావడం గమనార్హం. అయితే సరస్వతి అప్పటికే ఓ వ్యక్తిని ప్రేమించింది. మేనబావతో వివాహం ఇష్టం లేని సరస్వతి, తన మిత్రుడు శివ, విశాఖపట్నం రౌడీషీటర్ గోపీల సాయంతో భర్తను హత్య చేయించింది. ఎవరికీ అనుమానం రాకుండా ఉండేందుకు తనపైనా దాడి చేయించుకుంది. అదే విషయాన్ని పోలీసులకు ఫిర్యాదు చేసింది.

విచారణలో భాగంగా పోలీసులు హైవేపై తనిఖీలు చేస్తుండగా శివ, గోపీలు ప్రయాణిస్తున్న ఆటో వేగంగా వెళుతూ, ఎస్పీ ప్రయాణిస్తున్న వాహనాన్ని టేకోవర్ చేసింది. దీంతో ఆ ఆటోను ఆపిన ఎస్పీ, వారిని ప్రశ్నించగా, పొంతనలేని సమాధానాలు చెప్పారు. దీంతో అనుమానం వచ్చిన ఆయన, వారిని పోలీసులకు అప్పగించారు. సరస్వతిపై దాడి చేసిన వారు వీరేమోనన్న అనుమానంతో పోలీసులు విచారించగా, అసలు నిజం బయటకు వచ్చింది. కేసులో నిందితులను అదుపులోకి తీసుకున్నామని పోలీసులు వెల్లడించారు.

కాగా, సరస్వతిని కూడా అదుపులోకి తీసుకున్న పోలీసులు అమె ఫోన్ ను స్వాధీనం చేసుకుని అధారాల కోసం కాల్ డేటాను పరిశీలిస్తున్నారు. పెళ్లి ముందే శివ తనకు పరిచయమని అంగీకరించిన సరస్వతి, అతడినే వివాహం చేసుకోవాలని నిర్ణయించుకుంది. అయితే తమ కుటుంబసభ్యులు మేనబావతో వివాహం నిశ్చయించారని.. ఈ పెళ్లి వద్దని, తనకు ఇష్టం లేదని చెబుతున్నా, బలవంతంగా చేశారని చెప్పింది. తన భర్త శంకర్ రావు పవర్ ప్లాంట్ లో పనిచేస్తుంటాడని, మంచి వ్యక్తేనని తనను బాగా చూసుకున్నాడని అంగీకరిస్తూనే, శివను విడిచి ఉండలేక ఈ పని చేశానని విలపించినట్టు పోలీసు వర్గాలు వెల్లడించాయి.