ప్రేమ.. హత్య... రెండో పెళ్లి

Posted: 03/07/2018 11:52 AM IST

ప్రేమ పేరుతో యువతి గొంతు కోసిన యువకుడు.. ఆమెను హతమార్చిన మరుసటి రోజే మరో యువతి మెళ్లో తాళికట్టాడు. ఆ మర్నాడే పోలీసులకు పట్టుబడటంతో ఒక్కసారిగా గ్రామంలో కలకలం రేగింది.  యాదాద్రి జిల్లాలో మోత్కూరు గ్రామంలో ఈ ఘటన చోటు చేసుకుంది.

యాదాద్రి భువనగిరి జిల్లా మోత్కూరుకు చెందిన బొడ్డుపల్లి లక్ష్మయ్య కుమార్తె భార్గవి (23) డిగ్రీ వరకు చదివి, ఆత్మకూర్‌ మండల కేంద్రంలోని ఓ ఆసుపత్రిలో పని చేస్తోంది. బుజిలాపురం గ్రామానికి చెందిన నరేందర్‌ (28) అలియాస్‌ నరేష్ అదే ఆసుపత్రిలో అంబులెన్స్ డ్రైవర్ గా పని చేస్తున్నాడు. ఈ క్రమంలో వారిద్దరూ ప్రేమలో పడ్డారు. నాలుగేళ్లుగా వీళ్ల వ్యవహారం కొనసాగుతుండగా.. చివరకు పెళ్లి చేసుకుంటానని ఆమెను లోబర్చుకున్నాడు. అయితే కులాలు వేరంటూ చివరకు ఆమెను మోసం చేశాడు.

ఇంతలో నరేందర్‌, మరో అమ్మాయితో వివాహానికి సిద్ధమయ్యాడు. ఇది తెలిసిన భార్గవి అతనిని నిలదీసింది. దీంతో పన్నాగం పన్నిన నరేందర్.. పెద్దలకు తెలియకుండా పెళ్లి చేసుకుందామని ఆమెను నమ్మించాడు. శనివారం బుజిలాపురం సమీపంలోని తమ వ్యవసాయ బావి వద్దకు తీసుకెళ్లాడు. మాటల్లో పెట్టి, వెనుకనుంచి రాయితో ఆమె తలపై మోది హతమార్చాడు. అనంతరం అదే బావి వద్ద ఆమెను పూడ్చి పెట్టి ఏమీ తెలియనట్టు ఇంటికెళ్లిపోయాడు. మరుసటి రోజు పెద్దలు కుదిర్చిన పెళ్లి చేసుకున్నాడు.

వెలుగులోకి వచ్చిందిలా...
ఇంతలో భార్గవి కనిపించడం లేదని ఆమె తండ్రి పోలీసులకు ఫిర్యాదు చేశాడు. నరేందర్ తో ప్రేమ వ్యవహారం వారికి తెలిసి ఉండటంతో అతనిపై అనుమానం వ్యక్తం చేశాడు. దీంతో పెళ్లయిన మరుసటి రోజు పోలీసులు నరేందర్ ను విచారించగా, తన పెళ్లికి అడ్డుగా ఉండడంతోనే భార్గవిని హత్య చేసినట్టు అంగీకరించాడు. మృతదేహాన్ని మృతదేహాన్ని బయటకు తీయించిన పోలీసులు, నరేందర్ ను అదుపులోకి తీసుకుని రిమాండ్ కు పంపారు. నరేందర్ కు నాలుగేళ్ల క్రితమే వివాహం కాగా.. 15 రోజులకే విడాకులు తీసుకున్నాడు. తాజాగా బందువుల అమ్మాయితో మరో వివాహం చేశారు.