ముంబైలో శివసేన నేత అరెస్టు.. భవనం కూలడానికి కారకుడు..

Posted: 07/26/2017 05:14 PM IST

Sivasena leader arrested after mumbai building collapse kills 17

దేశ ఆర్థిక రాజధాని నగరం ముంబై తూర్పు ప్రాంతంలోని ఘాట్కోపర్ లో కుప్పకూలిన నాలుగంతస్థుల భవనంలో మృతుల సంఖ్య 17కు పెరిగింది. ఈ ఘటనకు అక్రమంగా చేపట్టిన మరమ్మత్తు పనులే కారణమని తేల్చిన అధికారులు.. అక్రమంగా మరమ్మతు పనులను చేపట్టిన శివసేన పార్టీకి చెందిన సునీల్ షిటాప్ ను అరెస్టు చేశారు. ఈ ప్రమాదంలో మూడేళ్ల చిన్నారి సహా 17 మంది మృత్యువాతపడ్డారు. భవన శిథిలాల తొలగింపు ప్రక్రియ ఇంకా కొనసాగుతోంది. అట్టడుగు అంతస్తులో చేపట్టిన మరమ్మతుల కారణంగానే భవనం కుప్పకూలినట్లు అధికారులు వెల్లడించారు.

అట్టడుగు అంతస్తులో శివసేన పార్టీ నేత సునీల్‌ షిటాప్‌ నర్సింగ్‌ హోమ్‌ నిర్వహిస్తున్నాడు. ఇటీవల ఇందులో మరమ్మతులు చేపట్టాడు. ఈ కారణంగానే 35 ఏళ్ల కాలం నాటి భవనం కుప్పకూలిందని పోలీసులు తెలిపారు. ఈ భనవంలో సుమారు 12 కుటుంబాలు నివసిస్తున్నట్లు వారు చెప్పారు. ఇటీవల జరిగిన బ్రిహన్ ముంబై మున్సిఫల్ కార్పోరేషన్ ఎన్నికలలో సునీల్ షీటాప్ సతీమణి శివసేన పార్టీ తరపున పోటీచేసి ఓటమి పాలయ్యారు. దీంతో తాను నాయకుడిని అన్న ధీమాతో అక్రమంగా చేపట్టిన మరమ్మతు పనులు వన నిర్మాణం కుప్పకూలడానికి కారణమైందని పోలీసులు తెలిపారు.

ఈ ఘటనపై కాంగ్రెస్‌ మాజీ కార్పొరేటర్‌ ప్రవీణ్‌ చెద్దా మాట్లాడుతూ.. సునీల్‌ షిటాప్‌, అతని భార్య స్వాతి సునీల్‌ షిటాప్‌ భవనంలోని అట్టడుగు అంతస్తులో నర్సింగ్‌ హోమ్‌ నిర్వహిస్తుండే వారని తెలిపారు. అయితే గత రెండు, మూడు నెలలుగా దానిని మూసివేశారని, దీంతో ఖాళీగా వుంచడం ఇష్టంలేని సునీల్ షీటాప్ దానిని గెస్ట్ హౌస్ గా మార్చుకోవాలని భావించి మరమ్మతులు చేపట్టాడని, అయితే వరుసగా వర్షాలు పడుతున్న సమయంలో 36 ఏళ్ల నాటి భవనం మరమ్మతుల సమయంలో కుప్పకూలిందని అరోపించారు.