పుతిన్ మనసులో అసలు ట్రంప్ లేడా?

Posted: 07/14/2017 09:29 AM IST

రష్యాతో కుమ్మకై తనను ఓడించారని అధ్యక్ష ఎన్నికల సందర్భంగా హిల్లరీ క్లింటన్ ట్రంప్ పై తీవ్ర ఆరోపణలు చేసిన విషయం తెలిసిందే. అగ్ర రాజ్య దేశ రహస్యాలను లీక్ చేశాడని, ప్రతిగా వాళ్లు ఎన్నికల్లో పరోక్షంగా ట్రంప్ గెలుపు కోసం కృషి చేశారంటూ తర్వాత కూడా ఆమె అనేకసార్లు విరుచుకుపడింది. అయితే వాటికి చెక్ పెడుతూ పుతిన్ ఓ ప్రముఖ మాగ్జైన్ కు ఇచ్చిన ఇంటర్వ్యూ ఒకటి హల్ చల్ చేస్తోంది.

నిజానికి రష్యా అధ్యక్షుడు పుతిన్‌ హిల్లరీ క్లింటనే అధ్యక్షురాలు కావాలని కోరుకున్నారంట. ఆమెకు అధికారం వస్తే అమెరికా బలహీనమవుతుంది, అది తమకే అనుకూలంగా మారుతుందని అంచనా వేశాడంట. ఈ విషయాలను ఓ ప్రభుత్వ మాగ్జైన్ ప్రచురించగా, ఆ కథనం లీక్ అయ్యింది. అయితే తాను ఊహించినట్లు జరగకపోయినప్పటికీ, మిగతా దేశాలతో మైత్రి కొనసాగిస్తూ.. శాంతి నెలకొల్పే దిశగా అడుగులు వేయాలని నిర్ణయించుకున్నట్లు తర్వాత ఆయన అదే సంచికకు ఇచ్చిన మరో ఇంటర్వ్యూలో పేర్కొన్నాడంట.

ఈ విషయాన్ని జీ-20 భేటీలో ట్రంప్ వద్ద కూడా ప్రస్తావించినట్లు సమాచారం. తను, పుతిన్‌ తమ దేశాల ప్రయోజనాల పరిరక్షణకు కట్టుబడి ఉన్నామన్నారు. ‘మా సైన్యం బలోపేతానికి నేను అధికశ్రద్ధ చూపాను. హిల్లరీ అధికారంలోకి వచ్చి ఉంటే సైన్యం బలహీనంగా మారేది. ఇంధనం ధర మరింత పెరిగేది. అందుకే పుతిన్ నన్ను వ్యతిరేకించారు’అని ట్రంప్ తెలిపాడు.

అభిశంసనకు తీర్మానం
రష్యా జోక్యంతో అమెరికా ఎన్నికల్లో గెలిచి, తమ దేశ న్యాయ ప్రక్రియకు విఘాతం కలిగించాడని డెమొక్రటిక్ పార్టీ ఆరోపిస్తుంది. ట్రంప్‌ను తొలగించాలని కోరుతూ ఎంపీ బ్రాడ్‌ షెర్మన్‌ అభిశంసన తీర్మానం ప్రవేశపెట్టారు. మరో డెమోక్రాట్‌ సభ్యుడు అల్‌ గ్రీన్‌ దీనిపై సంతకం చేశారు. అయితే, కాంగ్రెస్ లో డెమొక్రట్లకు తగిన మెజారిటీ లేకపోవటంతో ఇది వీగిపోయే అవకాశం ఉంది. కాగా, అమెరికా అధ్యక్షుడిపై అభిశంసన తీర్మానం ప్రవేశపెట్టడం ఇదే ఫస్ట్ టైం.