రేపిస్ట్ రిప్లై.. పోలీసుల మైండ్ బ్లాక్

Posted: 07/08/2017 11:29 AM IST

అమెరికాలో ఓ రేపిస్ట్ ఇచ్చిన ట్విస్ట్ కు పోలీసుల దిమ్మ తిరిగిపోయింది. కిడ్నాప్‌, రేప్ నేరానికి పాల్ప‌డి ప‌రారీలో ఉన్న 28 ఏళ్ల ఓ నేర‌స్థుడిని ప‌ట్టుకోవ‌డానికి పోలీసులు ఓ పని చేశారు. ఏకంగా సోషల్ మీడియాలో అతని గురించి పూర్తి వివరాలతో ఓ పోస్ట్ పెట్టేశారు. అయితే ఇక్కడే ఓ ఊహించని ఘటన జరిగింది.

వాషింగ్ట‌న్‌లోని నార్త్ క‌రోలినాలో డెరెక్ లీ హెమ్స్‌ ఓ యువతిని కిడ్నాప్ చేసి అత్యాచారం చేశాడన్న ఆరోపణలు ఎదుర్కుంటున్నాడు. అక్కడి పోలీసులు ఫేస్‌బుక్‌లో అతని ఫోటో, సమాచారం ఇవ్వాలంటూ ఓ పోస్ట్ పెట్టారు. నేర‌స్థునికి వ్య‌క్తిగతంగా ప‌రిచ‌య‌మున్న ఒక వ్య‌క్తి `ఇత‌ను అలాంటి వాడు కాదు.. చాలా మంచివాడు` అని కామెంట్ చేశాడు. దానికి రిప్లైగా స్వ‌యంగా నేర‌స్థుడే `థ్యాంక్యూ బ్ర‌ద‌ర్‌.. త్వ‌ర‌లో నిజం బ‌య‌ట‌ప‌డుతుంది` అని కామెంట్ పెట్టాడు.

కామెంట్ చూసి పోలీసులు షాక‌య్యారు. వెంటనే తేరుకుని `నువ్వు ఎక్క‌డున్నా స‌రే.. త్వ‌ర‌గా లొంగిపో` అంటూ పోలీసులు మరో కామెంట్ పెట్టారు. ఐపీ అడ్రస్ తో అతన్ని కనిపెట్టే యత్నంలో ఉన్న పోలీసులు తీవ్రమైన నేరంలో అతగాడు ఇరుక్కోవటంతో కఠినమైన చట్టాల కిందే కేసు నమోదైందని పోలీసులు చెబుతుండగా, అతను అమాయకుడని తల్లి మార్గరెట్ చెబుతోంది.