భారీ బాంబ్ బ్లాస్ట్.. మనోళ్లు సేఫ్

Posted: 05/31/2017 11:07 AM IST

అఫ్ఘనిస్థాన్ రాజధాని కాబూల్ ఉగ్రచర్యతో మరోసారి రక్తమోడింది. ఈ ఉదయం భారీ పేలుడు సంభవించి 50 మంది మృతి చెందారు. ఇండియన్ ఎంబసీ కి అతి సమీపంలో ఈ కారు బాంబు దాడి సంభవించింది. దీంతో భారత్ లోని వారి బంధువుల్లో ఆందోళన నెలకొంది.

అయితే కేంద్ర విదేశాంగ మంత్రి సుష్మాస్వరాజ్ దాడిలో అధికారులు అంతా సురక్షితంగా ఉన్నారంటూ తన ట్విట్టర్ లో పేర్కొంది. దేవుడి దయ వల్ల ఈ ప్రమాదంలో భారత్ కు చెందిన అధికారులెవరికీ ఏం కాలేదని, అక్కడి వారంతా సురక్షితంగా ఉన్నారంటూ తెలిపింది.

 

By God's grace, Indian Embassy staff are safe in the massive #Kabul blast.

— Sushma Swaraj (@SushmaSwaraj) May 31, 2017

దాడి జరిగిన తర్వాత ఒక్కసారిగా నగరం మొత్తం పొగ అలుముకుంది. ఉగ్రవాదుల టార్గెట్ ఏంటో స్పష్టంగా తెలీకపోయినప్పటికీ ప్రెసిడెంట్ భవనం, ఆ చుట్టుపక్కలే పలు దేశాల రాయబార కార్యాలయాలు ఉండటంతో భారీ నష్టం చేసేందుకే ఈ దాడి జరిగినట్లు స్పష్టం అవుతోంది. పేలుడు దాటికి చుట్టుపక్కల కిలోమీటర్ మేరలో ఇళ్లు ధ్వంసం అయ్యాయి. దాడికి కారకులంటూ ఇంతవరకు ఏ ఉగ్ర సంస్థ ప్రకటించకపోయినా, తరచూ దాడులు నిర్వహించే తాలిబన్ సంస్థే కారణం అయి ఉండొచ్చని అధికారులు భావిస్తున్నారు.

గత మూడు నెలల్లో వరుసగా 5 దాడులు జరగ్గా.. మే 3న నాటో భద్రత దళాలపై చేసిన దాడిలో 8 మంది మృత్యువాత పడ్డారు.