నితీశ్ కుమార్ సంచలన నిర్ణయం

Posted: 05/30/2017 08:30 AM IST

ఇప్పటికే దేశంలో ఎక్కడా లేని విధంగా సంపూర్ణ మద్యపాన నిషేధం విధించి శభాష్ అనిపించుకున్న బీహార్ ముఖ్యమంత్రి నితిశ్ కుమార్, ఇంకో సంచలనానికి రెడీ అయిపోతున్నాడు. బాల్య వివాహాలు, వరకట్న దురాచారంపై సమర భేరి మోగించేందుకు గాంధీ జయంతిని వేదిక చేసుకోబోతున్నాడు. అక్టోబర్ 2 నుంచి వాటికి వ్యతిరేకంగా విస్తృత ప్రచారం నిర్వహించనున్నట్టు ప్రకటించాడు.

మహిళల కోరిక మేరకు మద్య నిషేధం విధించిన ముఖ్యమంత్రి ఇటీవల ప్రజలతో జరిగిన ముఖాముఖి కార్యక్రమం ‘లోక్ సంవాద్’ సందర్భంగా ఓ మహిళతో మాట్లాడిన తర్వాత ఈ నిర్ణయం తీసుకున్నట్టు తెలిపారు. పాట్నాలో నిర్వహించిన మహావీర్ వత్సాలయ కేన్సర్ ఆసుపత్రి 11వ వ్యవస్థాపక దినోత్సంలో పాల్గొన్న నితిశ్ కుమార్ మాట్లాడాడు. బాల్యవివాహాలపై ఓ మహిళ జరుపుతున్న ప్రచారం తనకు స్ఫూర్తినిచ్చిందని నితిశ్ పేర్కొన్నారు.

2005లో తాము అధికారంలోకి వచ్చిన వెంటనే పల్స్ పోలియో కార్యక్రమాన్ని విజయవంతం చేయటం, సామాజిక దురాచారాలపై యుద్ధంతోపాటు ఆడపిల్లల రక్షణ, నిషేధం, డి-అడిక్షన్, మహిళా సాధికారత వంటి వాటిపై ప్రత్యేక శ్రద్ధ తీసుకున్నట్టు వివరించాడు. మహిళలు, చిన్నారుల్లో పౌష్టికాహార లోపం వంటి సమస్యలు ఉన్నాయని, త్వరలోనే వాటిపైనా దృష్టి సారిస్తామని నితిశ్ పేర్కొన్నాడు. అన్ని రంగాల్లో వెనుకబడిన బీహార్ ను టాప్ 5 రాష్ట్రాల్లో ఒకటిగా నిలిపేందుకే తాను కృషి చేస్తానని వెల్లడించాడు.

ఇక మద్యపాన నిషేధం అమలులో ఉన్నప్పటికీ కొందరు అధికారులు సీజ్ చేసిన మందు బాటిళ్లను స్వాహా చేయటం నితీశ్ కు ఆగ్రహాం తెప్పించింది. ఎలుకల పేరు చెప్పి లక్షల్లో మందు సీసాలను ఖాళీ చేయటంపై విచారణ కొనసాగుతుండగానే సీజ్ చేసిన బాటిళ్లను రోడ్డు రోలర్ తో తొక్కించేసి నాశనం చేయాలని అధికారులను ఆదేశించాడు.