పెళ్లయిన 24 గంటల్లో యాసిడ్ పోసి చంపింది

Posted: 05/24/2017 08:15 AM IST

ప్రేమించానని మోసం చేయటం, ఆపై బాధితులు తమ జీవితాలను తృణప్రాయంగా వదిలేస్తుండటం.. మరి శాడిస్టులైతే అవతలి వారిని టార్చర్ పెట్టడం లాంటి వ్వవహారాలు కొత్తేం కాదు. కానీ, తనని తనని కాకుండా వేరే యువతిని ప్రేమించి మరీ పెళ్లి చేసుకున్న యువకుడిపై ఓ యువతి దారుణంగా పగ తీర్చుకున్న ఘటన గుంటూరులో జరిగింది.

తాడికొండ మండలం పాములపాడుకు ఇలియాజ్ అనే యువకుడు ఐదేళ్ల క్రితం డిగ్రీ చదివే సమయంలో ఓ యువతిని ప్రేమించాడు. నాలుగేళ్లు వారి ప్రేమ కొనసాగాక బోర్ కొట్టి యువతిని వదిలేశాడు. ఆపై పెదకాకానికి చెందిన రోజ్ మేరీ అనే మరో యువతిని ప్రేమించి పెద్దలను ఒప్పించి పెళ్లి చేసుకున్నాడు. సోమవారం (మే 22న) వాళ్ల పెళ్లి ఓ మసీదులో ఘనంగా జరిగింది. ఇక విషయం తెలిసిన మొదటి ప్రేయసి పగతో రగిలిపోయింది.

ఇలియాజ్‌ స్నేహితుడు ఖాసింకు ఫోన్‌ చేసి, తాను ఇలియాజ్ తో సన్నిహితంగా ఉన్న ఫోటోలను ఇప్పించాలని బతిమాలింది. ఇదే విషయాన్ని ఖాసిం ఇలియాజ్ తో చెప్పి ఫోటోలు ఇప్పించే ఏర్పాటు చేశాడు. ఈ లోపు అత్తింటివారికి చేరుకున్న ఇలియాజ్ కు స్వయంగా ఫోన్ చేసిన మాజీ ప్రేయసి కలవాలని ఉందంటూ పిలిచింది. వెంటనే ఇలియాజ్ హుటాహుటిన బయలుదేరాడు. ఆపై సాయంత్రం 3 గంటల సమయంలో కొందరు స్థానికులు ఇలియాజ్ సోదరుడికి ఫోన్ చేసి, యాసిడ్ దాడి జరిగిందని కబురు అందించారు. తాను ప్రేమించిన యువతి తనపై యాసిడ్ దాడి చేసిందని, తాను ఎక్కువ సేపు బతకనని చెబుతూ మార్గం మధ్యలోనే ప్రాణాలు విడిచాడు ఇలియాజ్. ఇలియాజ్ స్నేహితుడు ఖాసింను అదుపులోకి తీసుకుని ప్రశ్నిస్తున్న పోలీసులు యువతి సింగిల్ గానే ఈ పని చేసి ఉండదని అనుమానిస్తున్నారు.