ఐసిస్ పోస్టర్ల కలకలం.. పోలీసులు అప్రమత్తం..

Posted: 03/19/2017 12:14 PM IST

భారత భూభాగంలోకి అంతర్జాతీయ ఉగ్రవాద సంస్థ ఐసిస్ ప్రవేశించిందా..? అన్న అందోళన ప్రజల్లో రేకెత్తగా, అలాంటిదేమీ లేదని పోలీసులు వివరణ ఇచ్చినా.. ఇప్పుడు ఆ సందేహాలకు బలం చేకూరుతుంది. తాజాగా ఇస్లామిక్‌ స్టేట్‌ ఆఫ్‌ ఇరాక్‌ అండ్‌ సిరియా పేరుతో వెలసిన పోస్టర్లే ఈ అనుమానాలను బలోపేతం చేస్తున్నాయి. బిహార్‌ యువతను ఐసిస్ లో చేరాలని ఆహ్వానిస్తూ పోస్టర్లు వెలువడం కలకలం రేపింది. బిహార్‌ సహస్రా జిల్లాలోని నౌహట్టా ప్రాంతంలో ఈ పోస్టర్లు దర్శనమిచ్చాయి.

ఐసిస్ పోస్టర్లలో ముఖాలకు మాస్క్‌ పెట్టుకున్న ఉగ్రవాదుల ఫొటోలు, ఐసిస్ అని అంగ్లంతో పాటు ఉర్దూలో కూడా రాసి వుంది. ఇక కింది బాగంలో మాత్రం అంగ్లంలో ఐసిస్ ఉగ్రవాద సంస్థలో చేరేందుకు ముందుకురావాలంటూ అంగ్లంలో రాసి వుంది. మావోయిస్టు ప్రభావిత ప్రాంతమైన నౌహట్టాలోని మూడు విద్యుత్ స్తంభాలకు అంటించారు. ఐసిస్ పోస్టర్ల నేపథ్యంలో అప్రమత్తమైన పోలీసులు వీటిని ఎవరు అతికించారు. ఎక్కడ ప్రింటింగ్ చేశారన్న కోణంలో దర్యాప్తు ప్రారంభించారు.

ఈ ప్రాంతంలో భద్రతపరమైన అలర్ట్‌ జారీచేశామని, పోస్టర్లు ఎవరు అంటించారనే దానిపై దర్యాప్తు ప్రారంభించామని పోలీసులు తెలిపారు. ఈ పోస్టర్ల గురించి స్థానిక గ్రామస్తులు సమాచారం ఇచ్చారని, వీటిని తాము స్వాధీనం చేసుకున్నామని, కరుడుగట్టిన నేరగాళ్ల హస్తం ఈ పోస్టర్ల వెనుక ఉన్నట్టు అనుమానిస్తున్నామని పోలీసులు తెలిపారు. ఇటీవల ఉత్తరప్రదేశ్‌ లక్నోలో ఇద్దరు ఐసిస్‌ అనుమానిత ఉగ్రవాదుల్ని పోలీసులు ఎన్‌కౌంటర్‌ చేసిన సంగతి తెలిసిందే.