ముద్రగడ ఎందుకంతలా ఫీలయ్యాడు?

Posted: 02/27/2017 08:31 AM IST

తమ సామాజిక వ‌ర్గానికి రిజ‌ర్వేష‌న్‌ల కోసం పోరాటం చేస్తోన్న మాజీ మంత్రి ముద్ర‌గ‌డ ప‌ద్మనాభం అందుకోసం సీనియర్లతో సహా దాదాపు అందరు కీలక నేతల మద్ధతు కూడగట్టుకుంటున్నారు. అయితే ఇందుకోసం తానెవరి వెంట పడబోనని స్వచ్ఛందంగా ముందుకు వచ్చేవారితోనే కాపు ఐక్య వేదిక కొనసాగుతుందని ప్రకటించాడు ఆయన. క‌ర్నూలులో ఓ కార్యక్రమానికి హాజరైన ఆయన మీడియాతో మాట్లాడుతూ... ఉద్య‌మ‌మే ఊపిరిగా బ‌తుకుతున్న తనపై ఎలాంటి ఒత్తిడి వచ్చినాసరే కాపు పోరాటం ఆగదని స్పష్టం చేశాడు.

ఇక 2019 ఎన్నికల్లో తీవ్ర ప్రభావం చూపే పార్టీ గా భావిస్తున్న జనసేన, దాని అధినేత పవన్ కళ్యాణ్ గురించి ఆయన ఆసక్తికర వ్యాఖ్యలు చేశాడు. కాపు ఉద్య‌మానికి పవన్ మ‌ద్ద‌తు ఇవ్వటం లేదా? అన్న ప్ర‌శ్న‌కు సమాధానమిస్తూ... ఆ విషయాన్ని ఆయన్నే అడ‌గాలని సూచించాడు. ఉద్య‌మంలో పాలు పంచుకున్న వారి గురించే అడ‌గాల‌ని, వారి గురించి చెబుతానే త‌ప్ప దూరంగా ఉండేవారి గురించి అడిగితే తాను చెప్ప‌బోన‌ని ముద్రగడ అన్నాడు. అసలు ఆ ప్రశ్న త‌న‌ను అడ‌గ‌డం స‌రికాదని తెలిపాడు.

అదే సమయంలో పాలు పంచుకోని వారిని తాను ఎట్టి పరిస్థితుల్లో ఇబ్బంది పెట్ట‌బోనన్న ఆయన పవన్ కలిసివస్తే మంచిదేనన్న రీతిలో వ్యాఖ్యలు చేశాడు. అదే సమయంలో ట్వీట్ల ద్వారానో, మీటింగ్ ల ద్వారానో సమస్యలు పరిష్కారం కావన్న రీతిలో పవన్ కి చురకలంటించటం కొసమెరుపు.  ఇక ఆంధ్ర‌ప్ర‌దేశ్ ప్ర‌భుత్వం త‌మ‌పై ఎన్నో హామీలు గుప్పించింద‌ని, ఇప్పుడు ఆ విష‌య‌మే మ‌ర‌చిపోయింద‌ని ఆయ‌న అన్నారు. త‌న‌కు కాపు రిజర్వేషన్లు తప్ప పదవీ మీద ఆశ‌లు లేవని, తమ వర్గానికి న్యాయం జ‌రిగేవ‌ర‌కు పోరాడ‌తాన‌ని మరోసారి స్పష్టం చేశాడు. అయితే ఉద్యమానికి మద్ధతు ఇవ్వకుండా పైగా పరోక్షంగా ప్రభుత్వానికి ఫేవర్ గానే మాట్లాడు తమతో కలిసిరాకపోవటం మూలంగానే ముద్రగడ ఇలా మాట్లాడి ఉండొచ్చని విశ్లేషకులు అంచనా వేస్తున్నారు.