బాబోయ్... సైకిల్ పై త్వరగా తేల్చండి!

Posted: 01/09/2017 05:51 PM IST

యూపీ రాజకీయాల్లో సైకిల్ సింబల్ పెట్టిన చిచ్చు మరో ములుపు తిరిగింది. విబేధాలు లేవంటూనే తండ్రి-కొడుకులు ఎన్నికల సంఘం అధికారిని కలవటం, సమాజ్ వాదీ గుర్తుపై సర్వహక్కులు మావేనంటూ మీడియా ముందు వాదులాడటం చూశాం. ఈ నేపథ్యంలో సైకిల్ ఎవ‌రిది? అనే అంశాన్ని తేల్చ‌డానికి త‌మ‌కు నివేదిక స‌మ‌ర్పించాలంటూ ఈసీ ఇచ్చిన గ‌డువు ఈ రోజుతో ముగిసింది.

ఇప్ప‌టికే ఉత్త‌ర‌ప్ర‌దేశ్ ముఖ్య‌మంత్రి అఖిలేష్ వ‌ర్గం ఈసీకి అఫిడ‌విట్ ఇచ్చి ఆ గుర్తు త‌మ‌కే ద‌క్కుతుంద‌ని ధీమా వ్య‌క్తం చేయగా, సోమవారం పార్టీ పెద్ద, నేతాజీ ములాయం సింగ్ యాద‌వ్ ఎన్నిలక కార్యాలయంకి వెళ్లారు. అక్కడ మీడియాతో మాట్లాడుతూ... త‌మ పార్టీలో జ‌రుగుతున్న గొడవల వెనుక ఓ వ్యక్తి(రాంగోపాల్ యాదవ్ ను ఉద్దేశించి) ఉన్నాడని వ్యాఖ్యానించారు. అతని మూలంగానే త‌మ‌ పార్టీలో ఓ సమస్య వచ్చిపడిందని చెప్పారు. తనకు, అఖిలేష్‌కు మధ్య ఎలాంటి వివాదాలు లేవ‌ని, తమ పార్టీలో నెలకొన్న సమస్యలు పరిష్కారమవుతాయని వ్యాఖ్యానించారు.

మరోవైపు ఈ విషయంలో అత్యధిక పార్టీ ప్రజా ప్రతినిధులు అఖిలేష్ వెంట ఉన్నారని పేర్కొన్న ఈసీ, ఎన్నికల గుర్తుపై మీరే తేల్చుకుని ఓ నిర్ణయానికి రావాలని స్పష్టం చేసినట్టు తెలుస్తోంది. అందుకు నేటి సాయంత్రం వరకూ సమయమిస్తున్నామని, ఓ నిర్ణయానికి రాకుంటే, నిబంధనల ప్రకారం తాము వ్యవహరిస్తామని ఈసీ వెల్లడించినట్టు తెలుస్తోంది. కాగా, ములాయం తరువాత, అఖిలేష్ సాయంత్రం మరోసారి ఈసీ అధికారులను కలవనున్నట్టు తెలుస్తోంది.