ITEMVIDEOS:ఆ యువతి ప్రశ్నకు పాక్ దగ్గర సమాధానం లేదు

Posted: 10/13/2016 08:28 PM IST

పాముకు పాలు పోసి పెంచినట్లు పాక్ ఆర్మీ ఉగ్రవాదులకు నిధులు, ఆశ్రయం తదితరాలు కల్పిస్తూ అప్పుడప్పుడూ దాని కాటుకే గురవుతూ వస్తోంది. ఈ మధ్య యూరి దాడి తర్వాత ప్రతీకారంగా ఇండియా ఆర్మీ చేసిన సర్జికల్ స్ట్రైక్ తో ప్రపంచ దేశాలన్నీ పాక్ ఉగ్రశ్చర్యలను ముక్తకంఠంతో ఖండిస్తున్నాయి. మరి అసలు పాక్ కి ఉగ్రవాదులతో సంబంధాలు అవసరమా? అంటే దానికి వారి దగ్గర సమాధానమే లేకుండా పోయింది. అయితే ఇదే ప్రశ్నను సంధిస్తూ ఓ యువతి పాక్ ఆర్మీని కడిగేసిన వీడియో ఒకటి సోషల్ మీడియాలో హల్ చల్ చేస్తోంది.

భారత్‌ లో జరుగుతున్న ఉగ్రదాడులకు పాక్ సాయం ఉందనేది జగద్విదితం. ఉగ్రవాదులను పంపేది పాక్ ఆర్మీ అనే ఒక వాదన ఉన్న సంగతి తెలిసిందే. దీనిపై రెండేళ్ల క్రితం పాకిస్థాన్ లో టీవీ ఛానెల్ డిబేట్ నిర్వహించింది. అందులో పాల్గొన్న ఓ యువతి ఉగ్రవాదులు, మిలటరీ సంబంధాలపై కడిగిపడేసింది. ప్రస్తుతం ఈ వీడియో సోషల్ మీడియాలో వైరల్ గా మారింది. ‘మిలటరీలో టెర్రరిజం పాత్ర’ అనే అంశంపై ఆ యువతి మాట్లాడుతూ, పాక్ మిలటరీకి ఉగ్రవాదులకు సంబంధం ఏంటని ప్రశ్నించింది.

 

చరిత్రను తవ్వితే వాస్తవాలు వెలుగులోకి వస్తాయని తెలిపింది. శత్రుత్వం పేరుతో, రాజకీయ ప్రయోజనాల పేరుతో ఎంత కాలం ఇలాంటి తప్పులు చేస్తుంటారని ప్రశ్నించింది. అమెరికా, భారత్, సమాజం, అవినీతి రాజకీయాలు ఇలా ఎన్ని మాట్లాడినా, జియావుల్ హక్ జనరల్ గా ఉన్న నాటి నుంచి ఉగ్రవాదులతో ఉన్న లింకులపై చర్చించాల్సిన అవసరం ఉందని ఆమె చెప్పింది. దేశంలోని ఏ రంగమూ పవిత్రంగా లేదని ఆమె మండిపడింది. వీటి గురించి నిర్లజ్జగా, వాస్తవాలు వాస్తవంగా మాట్లాడాలని ఆమె సూచించింది.

వాస్తవానికి దేశంలో మిలటరీ పాత్ర ఎంత? ఎంతవరకు ఉండాలి? అన్నది తెలియజేయాలని సూచించింది. దేశంలో ఉగ్రవాదం పెరగడానికి గల కారణమేంటని ప్రశ్నించింది. ఇందులో ప్రభుత్వ తీరును ఎండగట్టింది. అవినీతి రాజకీయ నాయకులపైనా దుమ్మెత్తి పోసింది. స్పష్టంగా, సూటిగా మాట్లాడుతున్న ఆ అందమైన యువతిని చూసి అక్కడున్నవారు కన్నార్పడం కూడా మర్చిపోవడం విశేషం.