ITEMVIDEOS:హోదాపై చెవిలో పెద్ద కమలం పెడుతున్నారన్న జైరాం

Posted: 09/09/2016 01:47 PM IST

Congress leader jairam ramesh responded on ap special package

సందట్లో సడేమియా అన్నట్లు ఏపీ హోదా వ్యవహారాన్ని ఆసరగా చేసుకుని బీజేపీని ఇరకాటంలో పెట్టేందుకు కాంగ్రెస్ మంచి స్కెచ్చే వేసింది. ఆ పార్టీ సీనియర్ నేత జైరాం రమేష్ ప్యాకేజీ అంశంపై మాట్లాడుతూ ఆర్థిక సంఘం ఆర్థిక హోదా ఇవ్వొద్దని ఎక్కడా చెప్పలేదని పెద్ద బాంబే పేల్చారు. ఆంధ్ర‌ప్ర‌దేశ్‌కి ప్ర‌త్యేక హోదా ఇవ్వ‌ని పాపం 14వ ఆర్థిక సంఘానిది కాద‌ని, అది ఎన్డీఏదేన‌ని జైరాం రమేష్ ఆరోపించారు. కాసేపటి క్రితం ఢిల్లీలో ఏర్పాటు చేసిన మీడియా స‌మావేశంలో ఆయ‌న మాట్లాడుతూ... కేంద్రం ప్ర‌జ‌ల‌ని మ‌భ్యపెడుతోంద‌ని అన్నారు.

పోలవరం ప్రాజెక్టుని రాష్ట్రానికి అప్పగించడం సరికాదని, ఒకవేళ అప్ప‌జెప్పితే చ‌ట్ట‌స‌వ‌ర‌ణ కూడా చేయాల్సి ఉంటుంద‌ని ఆయ‌న పేర్కొన్నారు. హోదా విష‌యంపై కేంద్ర మంత్రులు ఆర్థిక సంఘం అంటూ ఏవేవో మాట్లాడుతున్నారని అన్నారు. జైట్లీ ఏపీకి కొత్తగా ఏమీ ఇవ్వలేదని ఆయన పేర్కొన్నారు. వెంక‌య్య‌నాయుడు సీనియ‌ర్ మంత్రి త‌ర‌హాలో మాట్లాడ‌డం లేదని జైరాం ర‌మేష్ అన్నారు.

హోదా ఇవ్వ‌క‌పోతే ఏపీకి ఎంతో నష్టం క‌లుగుతుంద‌ని ఆయ‌న అన్నారు. ఏపీకి హోదా ఇవ్వ‌క‌పోవ‌డం వ‌ల్ల ఏటా 60 వేల కోట్ల రూపాయ‌లు నష్టమ‌ని అన్నారు. మ‌రో మూడేళ్లలో ఎన్నో కోట్ల నష్టం జ‌రుగుతుంద‌ని ఆయ‌న వ్యాఖ్యానించారు. కాంగ్రెస్ పై విమ‌ర్శ‌లు మానుకొని ఏపీకి న్యాయం చేయాలని ఆయ‌న డిమాండ్ చేశారు.

ఉపరాష్ట్రపతి పదవి కోసమే వెంకయ్య...
కార‌ణాలేంటో తెలియ‌దు కానీ వెంక‌య్య అస‌హ‌నంతో ఉన్నారని జైరాం రమేష్ వ్యాఖ్యానించారు. ఉప‌రాష్ట్ర‌ప‌తి ప‌ద‌వి కోస‌మే వెంక‌య్య ఇదంతా చేస్తున్నారని ఆయ‌న ఆరోపించారు. ఇత‌రుల‌ను నిందించ‌డం మానేసి హోదా కోసం చ‌ట్ట‌ స‌వ‌ర‌ణ చేయాల‌ని ఆయ‌న‌ సూచించారు. చట్టంలోని అంశాలను కేంద్రం పక్కదారి పట్టిస్తోందని ఆయన ఆరోపించారు. ఎన్డీఏ గందరగోళం నెలకొల్పుతోందని వ్యాఖ్యానించారు.