సెక్యూరిటీ గార్డులే లక్ష్యంగా ఆత్మాహుతి దాడి

Posted: 06/20/2016 03:52 PM IST

తాలిబాన్ సూసైడ్ బాంబర్ దాడి తో సోమవారం ఉదయం ఆఫ్ఘనిస్తాన్ రాజధాని కాబూల్‌ దద్దరిల్లింది. సెక్యూరిటీ గార్డులు ప్రయాణిస్తున్న ఓ మినీ బస్సును లక్ష్యంగా చేసుకుని చేసిన దాడిలో  24 మంది చనిపోయారు. పేలుడు తీవ్రమైంది కావటంతో 327 మంది గాయపడ్డారు. పూల్-ఏ-చర్కి రోడ్లో సంభవించిన ఈ ఘటనలో 14 మంది మృతి చెందినట్లు ఆఫ్గన్ ప్రభుత్వ వర్గాలు చెబుతున్నప్పటికీ స్థానికులు మాత్రం ఆ సంఖ్య 24 గా చెబుతున్నారు.

భారీ శబ్దంలో పేలుడు సంభవించినట్లు ప్రత్యక్ష సాక్షులు స్థానిక మీడియాతో మాట్లాడుతూ తెలిపారు. దాడికి పాల్పడింది తామేనంటూ తాలిబాన్ ఉగ్రవాద సంస్థ ప్రకటించింది. బాంబులు ధరించిన ఓ వ్యక్తి బస్సు సమీపంలోకి  కాలినడకన వచ్చి తనను తాను పేల్చేసుకున్నాడని అధికారులు వెల్లడించారు. మృతి చెందిన వారంతా నేపాల్ సెక్యురిటీ గార్డ్స్ గా తేలింది. .మరికొంత మంది క్షతగాత్రులను సమీపంలోని ఆసుపత్రికి తరలించి చికిత్స అందిస్తున్నారు.

ఈ ఆత్మాహుతి దాడిని ప్రధాని నరేంద్రమోదీ ట్విట్టర్ లో తీవ్రంగా ఖండించారు. నేపాల్‌ సెక్యూరిటీ గార్డులు ప్రయాణిస్తున్న మినీబస్సుపై దుండగుల అత్మాహుతి దాడి హేయమైన చర్య. ప్రమాదంలో 14మంది సెక్యూరిటీ గార్డుల మృతికి ప్రగాఢ సంతాపాన్ని తెలియజేస్తున్నా. ఉగ్రవాదాన్ని నిర్మూలించేందుకు నేపాల్ ప్రభుత్వానికి భారత్ పూర్తి సహకారం అందిస్తుందని మోదీ స్పష్టం చేశారు.

భాస్కర్