క్లచ్ లేని బైక్ తో లాభాలు... ఎలాగంటే?

Posted: 06/20/2016 05:07 PM IST

ప్రముఖ మోటర్ బైక్ ల కంపెనీ టీవీఎస్ త్వరలో క్లచ్ లేని బైక్ లను దేశీయ మార్కెట్లోకి విడుదల చేయనుంది. సెమీ ఆటోమేటెడ్ టెక్నాలజీతో రూపొందించనున్న ఈ విధానం ఏడేళ్ల క్రితమే రూపుదిద్దుకున్నప్పటికీ ఈ సంవత్సరం దానికి పేటెంట్ లభించింది. ఇక ఈ బైక్ లో క్లచ్ లేకుండా కేవలం హ్యాండిల్ దగ్గర ఓ మెకానిజం ఏర్పాటు చేస్తారు. దానిపై ఉండే స్విచ్ లతో గేర్లను మార్చుకోవచ్చు. పైకి మార్చుకునేందుకు ఓ బటన్, తిరిగి కిందకి మార్చేందుకు ఓ బటన్ ఉంటాయి. వాటిని నొక్కితే చాలు గేర్లు వాటంతట అవే మారిపోతాయి.   

ఇక కొత్తగా రూపొందించబోయే బైక్ లో క్లచ్ లేకపోవటం వల్ల 5 శాతం దాకా ఇంధనాన్ని ఆదా చేసే అవకాశం ఉంటుందని సంస్థ చెబుతోంది. అంతేకాదు బాగా ట్రాఫిక్ ఉన్న నగరాల్లో వాహనదారులకు చాలా ఉపయోగకరంగా ఉంటుందని పేర్కొంది. అపాచీ మోడళ్లలో ఈ సెమీ ఆటోమేటెడ్ టెక్నాలజీని వాడనున్నట్లు తెలిపారు. అతి త్వరలో ఈ క్లచ్ లు లేని బైకులు మార్కెట్లోకి దించేందుకు టీవీఎస్ సన్నాహాలు చేస్తోంది.

భాస్కర్