తెలంగాణలో మరో కీలక ప్రాజెక్టు!

Posted: 06/18/2016 04:10 PM IST

పారిశ్రామిక రంగంలో ఇప్పటికే దూసుకుపోతున్న తెలంగాణ మెడలో మరో మణిహరం పడింది. ఇప్పటికే టాప్ కంపెనీలు తమ యూనిట్లను రాష్ట్రంలో ప్రారంభించగా, తాజాగా టాటా గ్రూపుల నుంచి మరో ప్రతిష్టాత్మక ప్రాజెక్టు ఆ జాబితాలో చేరింది. బోయింగ్ ఏరో స్పేస్ పేరిట భారత పారిశ్రామిక దిగ్గజం టాటా సన్స్ చేపడుతున్న కీలక ప్రాజెక్టుకు తొలి అడుగు హైదరాబాద్ వేదికగా పడింది.

ఆదిభట్ల సెజ్ లో శనివారం ఈ ప్రాజెక్టుకు కేంద్ర రక్షణ శాఖ మంత్రి మనోహర్ పారీకర్ భూమి పూజ చేశారు. టాటా బోయింగ్ ఏరో స్పేస్ యూనిట్ లో విమానాలు, హెలికాప్టర్ విడిభాగాలు తయారు కానున్నాయి. తొలి విడతగా ఈ ప్రాజెక్టు కోసం టాటా సన్స్ రూ.200 కోట్లు పెట్టుబడిగా పెడుతున్నట్లు సమాచారం. ఈ సందర్భంగా తెలంగాణ ఐటీ, పరిశ్రమల శాఖ మంత్రి కేటీఆర్ మాట్లాడుతూ.. పెట్టుబడులను అనుకూలంగా ఉన్న తెలంగాణకు పలు ప్రతిష్ఠాత్మక సంస్థలు తరలివస్తున్నాయని పేర్కొన్నారు. తెలంగాణ ప్రభుత్వానికి కేంద్రం అండగా నిలుస్తుందని మంత్రి పారికర్ ప్రకటించారు. కేంద్రం నుంచి రావాల్సిన అన్ని ప్రయోజనాలను అందించేందుకు తనవంతు కృషి చేస్తానని ఆయన హామీ ఇచ్చారు.

భాస్కర్