ఇకపై ఆ ప్రకటనలు కలర్ ఫుల్.. దర్శనమియ్యనున్న ముఖ్యమంత్రులు

Posted: 03/18/2016 05:50 PM IST

ఇకపై రాష్ట్ర ప్రభుత్వాలు జారీ చేసే ప్రకటనలు కలర్ ఫుల్ గా కనిపించనున్నాయి. ప్రభుత్వాలు జారీ చేసే ప్రకటనలలో ఆయా రాష్ట్ర ప్రభుత్వాల మంత్రుల కూడా కనిపించనున్నారు. గతంలో మాదిరిగానే ఇక రాష్ట్ర ప్రభుత్వాలు తమ ప్రకటనలను జారీ చేసుకోవచ్చు. ఆ రాష్ట్ర గవర్నర్, ముఖ్యమంత్రి సహా ఇకపై ఆయా శాఖకు సంబంధించిన రాష్ట్ర మంత్రులు కూడా ప్రకటనలలో దర్శనమియ్యనున్నారు. ఈ మేరకు దేశ సర్వోన్నత న్యాయస్థానం ధర్మసానం సూచించింది.

ప్రభుత్వం విడుదల చేసే ప్రకటనలలో గవర్నర్, ముఖ్యమంత్రితో పాటు సంబంధిత శాఖ మంత్రి ఫొటోలు కూడా పెట్టుకోవచ్చని సుప్రీంకోర్టు తెలిపింది. జస్టిస్ రంజన్ గొగోయ్ నేతృత్వంలోని సుప్రీం ధర్మాసనం ఈ అంశంపై విచారించింది. ఇంతకుముందు ప్రభుత్వ ప్రకటనలలో కేవలం రాష్ట్రపతి, ప్రధానమంత్రి, సుప్రీంకోర్టు ప్రధాన న్యాయమూర్తుల ఫొటోలను మాత్రమే ప్రచురించాలి తప్ప గవర్నర్, ముఖ్యమంత్రి తదితరుల ఫొటోలు వాడకూడదని ఇచ్చిన తీర్పును బెంచ్ సవరించింది.

ఈ విషయమై సుప్రీంకోర్టు అభిప్రాయాన్ని కోరుతూ అసోం, పశ్చిమబెంగాల్, తమిళనాడు, కర్ణాటక రాష్ట్రాల ప్రభుత్వాలతో పాటు కేంద్ర ప్రభుత్వం కూడా కోర్టును ఆశ్రయించింది. ఈ ఉత్తర్వులు దేశ సమాఖ్య వ్యవస్థకు విరుద్ధంగా ఉన్నాయని వాదించాయి. దీంతో విచారణను స్వీకరించిన సుప్రీంకోర్టు ధర్మాసనం ఇవాళ తన తీర్పును సవరిస్తూ నిర్ణయాన్ని వెలువరించింది.

మనోహర్