వేధింపులు భరించలేక మెడికో ఆత్మహత్య

Posted: 01/31/2016 12:39 PM IST

ర్యాగింగ్ భూతం విద్యార్థుల పాలిట దెయ్యంలా మారింది. ర్యాగింగ్ దెబ్బతో మరో విద్యార్థిని అసువులు బాసింది. వేధింపుల కారణంగా సారికా గుప్తా అనే ఓ 22 ఏళ్ళ వైద్య విద్యార్థిని ఆత్మహత్యకు పాల్పడింది. ఈ ఘటన ఉత్తరప్రదేశ్‌ రాజధాని లక్నోలో చోటుచేసుకుంది. పోలీసులు తెలిపిన వివరాల ప్రకారం వికాస్‌-నగర్‌ పోలీస్ స్టేషన్ పరిధికి చెందిన ఓ మెడికల్‌ కాలేజీ విద్యార్థిని సారికా గుప్తా ఆత్మహత్యకు పాల్పడింది. గత కొంతకాలంగా ఆమెను ఓ యువకుడు వేధిస్తున్నాడని, ఈ విషయాన్ని పోలీసులకు చెప్పినా ఎలాంటి ఫలితమూ లేకపోవడంతో ఆత్మహత్య చేసుకుందని బంధువులు తెలిపారు.

స్థానికంగా ఎంబీఏ చదివే అజయ్‌ విశ్వకుమార్‌ అనే యువకుడిపై మృతురాలి తల్లిదండ్రులు ఫిర్యాదు చేశారు. తమ కుమార్తెపై యాసిడ్‌ పోస్తానంటూ అజయ్‌ బెదిరించాడని వారు ఫిర్యాదులో పేర్కొన్నారు. ఈ మేరకు యువకుడిపై కేసు నమోదు చేసుకుని, దర్యాప్తు చేస్తున్నట్లు పోలీసులు తెలిపారు. అయితే తమ కుమార్తె నిరంతరం తనను వేధిస్తున్న ఆ ఈవ్ టీజర్-పై ఫిర్యాదు చేసినా పోలీసులు పట్టించుకోలేదని, కనీసం 1090 హెల్ప్-లైన్ విభాగం కూడా స్పందించలేదని విద్యార్థిని తండ్రి ఆవేదనతో ఆరోపించారు. మెడికో ఆత్మహత్య చేసుకున్న తరువాత మాత్రమే అజయ్ విశ్వకర్మ అనే పోకిరిపై ఎఫ్ఐఆర్ నమోదు చేయడం విమర్శలకు దారి తీసింది.