బారత్ లో ఐసిస్ దాడులకు అవకాశాలు.. అప్రమత్తత

Posted: 11/18/2015 08:02 AM IST

ఐఎస్ఐఎస్ ఉగ్రవాద సంస్థపై ఫ్రాన్స్ ప్రకటించిన యుద్ధానికి సంపూర్ణ మద్దతు ప్రకటించిన నేపథ్యంలో ఆ ఉగ్రవాద సంస్థ నుంచి భారత దేశానికి మరింత ముప్పు పొంచి ఉందని భద్రతా సంస్థలు భావిస్తున్నాయి. పారిస్ స్థాయి నగరంలోనే అసాధారణ స్థాయి దాడులతో ఇస్లామిక్ స్టేట్ విరుచుకుపడిన నేపథ్యంలో దాని నుంచి పొంచి ఉన్న ముప్పును మరోసారి సమీక్షించాలని భారత భద్రతా సంస్థలు భావిస్తున్నాయి. పారిస్ దాడుల అనంతరం ఐఎస్ఐఎస్ నుంచి పొంచి ఉన్న ముప్పును హైలెవల్‌ గా భావిస్తున్నామని, అదేవిధంగా దేశంలో దాని కార్యకలాపాలను నిరోధించేందుకు కౌంటర్ వ్యూహాన్ని తీసుకురావావాలని అనుకుంటున్నామని నిఘా వర్గాలు తెలిపాయి. యూరప్‌ లోనే అత్యంత కీలకమైన నగరం, అత్యంత భద్రత ఉండే ప్రదేశమైన పారిస్‌-లోనే భారీ దాడులు నిర్వహించడంతో ఇస్లామిక్‌ స్టేట్ ఉగ్రవాద సంస్థ బలం, ఆత్మవిశ్వాసం పుంజుకునే అవకాశముందని, ఈ నేపథ్యంలో సహజంగానే మరిన్ని భారీ దాడులకు పాల్పడేందుకు అది ప్రయత్నిస్తుందని ఇంటెలిజెన్స్ అధికారులు తెలిపారు.

ఏ నగరాన్నైనా ఐఎస్ఐఎస్ ఇప్పుడు లక్ష్యంగా చేసుకోగలదని, ఈ నేపథ్యంలో ముందుగానే ఈ ముప్పు గుర్తించి దానికి అనుగుణమైన భద్రతా వ్యూహాన్ని సిద్ధం చేస్తున్నట్టు నిఘా వర్గాలు తెలిపాయి. ఐఎస్‌ఐఎస్‌ ను ఎదుర్కోవడంలో ఫ్రాన్స్ కు పూర్తి సహకారం అందిస్తామని కేంద్ర హోంశాఖ సహాయ మంత్రి కిరెన్‌ రిజిజు ఢిల్లీలోని ఫ్రాన్స్‌ రాయబార కార్యాలయంలో మాట్లాడుతూ చెప్పారు. అయితే ఐఎస్ఐఎస్‌-పై పోరులో ఫ్రాన్స్ కు భారత్‌ ఏ తరహా సాయం అందిస్తుందనే దానిపై ఇంకా ఒక స్పష్టత రాలేదని అధికార వర్గాలు తెలిపాయి. కాగా జమ్ము కాశ్మీర్ లో, శ్రీనగర్ లలో ఐసిస్ దాడులకు చాలా అవకాశాలు ఉన్నట్లు కూడా నిఘా వర్గాలు హెచ్చరించినట్లు తెలుస్తోంది. దాంతో దేశంలో అన్ని రాష్ట్రాలు భద్రతను మరింత కట్టుదిట్టం చెయ్యాలని కేంద్ర హోంశాఖ ఆదేశాలు జారీ చేసింది.