అనురాధ దంపతుల హత్య కేసులో ముగ్గురి లొంగుబాటు.. ఫాక్షన్ హత్యలేనన్న గాలి..

Posted: 11/17/2015 02:02 PM IST

Three surrendered in anuradha murder case

చిత్తూరు మేయర్ అనురాధ హత్యకేసులో ఇద్దరు దుండగులు లొంగిపోయారు. హత్య జరిగిన వెంటనే దుండగులు చిత్తూరు వన్‌టౌన్ పోలీస్‌స్టేషన్‌లో లొంగిపోయినట్లు సమాచారం. మంగళవారం మధ్యాహ్నం మేయర్ దంపతులపై కాల్పులు జరిపిన తర్వాత.. తామే కాల్పులు జరిపామంటూ ఇద్దరు వ్యక్తులు లొంగిపోయారు. అయితే ఈ వార్తలను మాత్రం పోలీసులు ఇంకా నిర్ధారించలేదు. దుండగుల వివరాలు వెల్లడించేందుకు పోలీసులు నిరాకరిస్తున్నారు. కాగా లోంగిపోయిన వారు రెడ్డి, వెంకటేష్ లుగా సమాచారం. మూడో వ్యక్తి కోర్టులో లోంగిపోయినట్లు తెలుస్తోంది. మరోవైపు సంఘటన స్థలానికి చేరుకున్న స్పెషల్ బ్రాంచి డీఎస్పీ రామ్‌కుమార్, క్రైమ్ బ్రాంచి డీఎస్పీ రామకృష్ణ ఆధారాలు సేకరిస్తున్నారు. దుండగులు తప్పించుకోకుండా వుండేందుకు జిల్లాలోని చెక్‌పోస్టులను అప్రమత్తం చేశారు.

Also Read : రెక్కీ నిర్వహించి.. పక్కా పథకంతో అనురాధ దంపతుల హత్య..?

చిత్తూరు మేయర్ అనురాధ దంపతులపై జరిగిన దాడి ఫాక్షనిస్టు హత్యేగా టీడీపీ సీనియర్ నేత, ఆ పార్టీ ఎమ్మెల్సీ గాలి ముద్దుకృష్ణమనాయుడు పేర్కోన్నారు. కఠారి దంపతులపై కర్ణాటకకు చెందిన వ్యక్తులు దాడి చేశారన్న ఆరోపణలను ఆయన కొట్టిపారేశారు. ఈ దాడి చిత్తూరు ఫ్యాక్షనిస్టుల పనేనని ఆయన తేల్చిచెప్పారు. కర్ణాటకకు చెందిన వ్యక్తులు కఠారి దంపతులపై దాడి చేయాల్సిన అవసరమేమీ లేదని కూడా ఆయన వ్యాఖ్యానించారు. టీడీపీలో కష్టపడే తత్వమున్న కార్యకర్తగా అనురాధ పేరు తెచ్చుకున్నారని, ఆమె మృతి పార్టీకి తీరని లోటన్నారు. స్వర్గీయ నందమూరి తారకరామారావుపై ఎనలేని గౌరవమున్న కఠారి దంపతులు పార్టీకి నమ్మిన బంటులని గాలి పేర్కొన్నారు.

జి. మనోహర్