‘మిస్డ్-కాల్’ పరిచయం సారిక జీవితాన్నినాశనం చేసింది!

Posted: 11/14/2015 10:42 AM IST

Sana revealed her love marriage story with siricilla anil who arrested in sarika death case

మాజీ ఎంపీ సిరిసిల్ల రాజయ్య కోడలు సారిక, ఆమె ముగ్గురు పిల్లల సజీవ దహనం కేసులో పోలీసులు ఓ కీలక సమాచారాన్ని సేకరించారు. ఈ కేసులో ఏ4 నిందితురాలిగా ఉన్న అనిల్ రెండో భార్య సనను రిమాండ్ కు తరలించిన పోలీసులు.. విచారణలో భాగంగా ఆమె నుంచి ఓ ఆసక్తికరమైన విషయాన్ని రాబట్టగలిగారు. సనతో పరిచయం ఏర్పడకముందు అనిల్ తన భార్య సారికను చాలా బాగా చూసుకున్నాడని, కానీ ఆమెతో పరిచయం అయిన తర్వాత పరిస్థితులు పూర్తిగా మారిపోయాయని తేలింది. అంతకుముందు.. సనతో అనిల్ కు ఎలా పరిచయమైందన్న కోణాన్ని పోలీసులు నిగ్గు తేల్చారు.

కాజీపేటలోని ఫాతిమానగర్ బ్యాంగిల్ స్టోర్ నిర్వహిస్తున్న సనకు అనిల్ తో తొలుత ఓ మిస్డ్ కాల్ తోనే పరిచమయమైందట. అంతకుముందు వ్యక్తిగతంగా ఏ సంబంధంలేని వీరిని ఆ మిస్డ్-కాల్ పరిచయం చేసింది. ఈ క్రమంలో వారిద్దరి మధ్య ఏర్పడ్డ పరిచయం ప్రేమగా మారింది. అనంతరం పెళ్లిగా రూపాంతరం చెందింది. పెళ్లి చేసుకున్న తర్వాత అనిల్, సన తమ మకాంను సికింద్రాబాదుకు మార్చారు. అక్కడ అన్యోన్యంగా తమ జీవితాన్ని కొనసాగించారు. ఇక్కడో ట్విస్ట్ ఏంటంటే... తొలి సంతానం కలిగే దాకా అనిల్ సిరిసిల్ల రాజయ్య కుమారుడని కానీ, అతడికి అప్పటికే పెళ్లి అయ్యిందన్న విషయం కానీ సనకు తెలియదట. తొలి కాన్పు తర్వాత విషయం తెలుసుకున్న సన తన భర్త అనిల్ ను నిలదీసింది. ఈ క్రమంలో వారిద్దరి మధ్య పలుమార్లు వాగ్వాదం కూడా చోటుచేసుకుంది.

ఇక అనిల్ రెండో పెళ్ళి విషయం బట్టయలు కావడంతో తరువాతి కాలంలో సారికతోనూ సన పలుమార్లు గొడవ పడిందని పోలీసులు చెబుతున్నారు. చివరకు అనిల్ తో విడిపోయేందుకు సిరిసిల్ల కుటుంబం రూ.10 లక్షలను సనకు ఆఫర్ చేసింది. దీనికి సన కూడా సమ్మతించిందని సమాచారం. అయితే ఈ లావాదేవీలో జాప్యం జరగడం, అంతలోగానే సారిక పిల్లలతో సహాసజీవ దహనం కావడంతో సన చిక్కుల్లో పడిపోయింది. ఘటన జరిగిన వెంటనే పరారైన సన, ఖమ్మంలో తలదాచుకున్నట్లు తొలుత వార్తలొచ్చాయి. అయితే ఓ మధ్యవర్తి సహాయంతో సన తమ ఎదుట లొంగిపోయిందని కోర్టుకు వరంగల్ పోలీసులు చెప్పారు. కాగా.. సారిక మృతికేసులో సిరిసిల్ల రాజయ్యతోపాటు ఆయన భార్య మాధవి, అనిల్ లను అరెస్ట్ చేసిన పోలీసులు వారిని రిమాండ్ కు తరలించారు.