నింగిలోకి దూసుకెళ్లిన జీశాట్-15

Posted: 11/11/2015 04:46 PM IST

దేశంలో అన్ని ప్రాంతాల్లో దీపావళి వెలుగులు వెలుగుతున్నాయి. అయితే అంతరిక్షంలో కూడా మన తారా జువ్వను వెలిగించింది ఇస్రొ. తాజాగా జీశాట్-15 ఉపగ్రహాన్ని విజయవంతంగా నింగిలోకి పంపి.. దీపావళి వెలుగులను రెట్టింపు చేసింది ఇస్రో. ఫ్రెంచ్‌ గయానాలోని కౌరౌ నుంచి తెల్లవారుజామున 3-04 గంటలకు దీనిని ప్రయోగించినట్లు ఇస్రో తెలిపింది. టెలికమ్యూనికేషన్ల సేవలకు, నేవిగేషన్‌, అత్యవసర సేవలకు ఉపయోగపడేలా ఈ ఉపగ్రహాన్ని రూపొందించారు. అరబ్‌శాట్‌-6బిని రోదసిలోకి పంపిన తర్వాత జీశాట్ -15ను జియోసింక్రనస్‌ ట్రాన్స్‌ఫర్ ఆర్బిట్‌లోకి పంపించారు. జీశాట్‌-15 బరువు 3,164 కేజీలు. ఇన్‌శాట్, జీశాట్‌ సిస్టమ్‌లోకి పంపించిన అత్యంత శక్తిమంతమైన ఉపగ్రహం జీశాట్‌ -15. కేయూ బ్యాండ్‌లో 24 కమ్యూనికేషన్‌ ట్రాన్స్‌పాండర్లను మోసుకుపోగలదు. ఎల్‌1, ఎల్‌5 బ్యాండ్లలో జీపీఎస్‌ ఎయిడెడ్‌ జీఈఓ ఆగ్‌మెంటెడ్‌ నేవిగేషన్‌ పేలోడ్‌తో పని చేస్తుంది.

కౌరౌలో ఇస్రో ఉపగ్రహ కేంద్రం డైరెక్టర్‌ ఎం. అన్నాదురై మాట్లాడుతూ జీశాట్-15 ఉపగ్రహం సంకేతాలు కర్ణాటకలోని హసన్‌లో ఉన్న మాస్టర్‌ కంట్రోల్ ఫెసిలిటీ స్వీకరించినట్లు తెలిపారు. ఇనిషియలైజేషన్‌ కమాండ్స్‌ ప్రక్రియ కొనసాగుతోందని, ఉపగ్రహం బాగా పని చేస్తోందని చెప్పారు. జీశాట్‌-15తో దేశంలోని కేయూబ్యాండ్ యూజర్లకు నిరంతర సేవలు అందజేయడానికి వీలవుతుందన్నారు. పౌర విమానయానం, తదితర సేవలకు ఇది ఉపయోగపడుతుందన్నారు. జీశాట్‌-17, జీశాట్‌-18 ఉపగ్రహాలను వచ్చే ఏడాది ప్రయోగించేందుకు సన్నాహాలు చేస్తున్నట్లు తెలిపారు. జీశాట్‌-15 ప్రయోగం వల్ల ఉపగ్రహ చోదక మౌలిక సదుపాయాల వ్యవస్థ బలోపేతం దిశగా ముందడుగు పడినట్లయిందన్నారు. దేశంలోని కమ్యూనికేషన్‌ ఇన్‌ఫ్రాస్ట్రక్చర్‌ సుస్థిరమవుతుందని ఇస్రో చైర్మన్‌ ఏఎస్‌ కిరణ్‌ కుమార్‌ వెల్లడించారు.