పులి చిత్రం నటీనటులపై పంజా విసిరిన ఆదాయశాఖ

Posted: 09/30/2015 11:09 AM IST

తమిళ నటుడు విజయ్ ఇంటిపై ఆదాయపన్ను అధికారులు దాడులు నిర్వహించారు. ఆయన నటించిన తాజా చిత్రం పులి గురువారం విడుదల కానున్న నేపథ్యంలో.. ఒక్క రోజు ముందుగా ఐటీ అధికారులు విజయ్ ఇంట్లో సోదాలు నిర్వహించారు. విజయ్‌తో పాటు దక్షిణాధి చిత్ర పరిశ్రమకు చెందిన నటీమణులు సమంత మరియు నయనతారల ఇళ్లలోనూ ఇవాళ ఉదయం ఆదాయపన్ను శాఖ అధికారులు సోదాలు చేపట్టారు. వీరితో పాటు పులి చిత్రం టీమ్ కు చెందిన మొత్తం 25 మంది ఇళ్లపై ఏకకాలంతో అదాయ శాఖ దాడులు నిర్వహించింది.

విజయ్ నటించిన తాజా చిత్రం ‘పులి’ సినిమాని నిర్మించిన శిబు సెల్వకుమార్ ఇంట్లోనూ ఐటీ సోదాలు జరిగాయి. చెన్నై, కొచ్చి, మధురై, హైదరాబాద్ నగరాల్లో ఏకకాలంలో దాడులు జరిగాయి. దేశవ్యాప్తంగా 32 ప్రాంతాల్లో ఐటీ సోదాలు జరుగుతున్నాయి. ప్రస్తుతం పోలాండ్‌లో సూర్య సినిమా షూటింగ్‌లో ఉన్న సమంత, తన ఇంటిపై ఐటి దాడులు జరిగాయని తెలుసుకొని నివ్వెరపోయింది. అయితే సమంత, నయనతార ఇళ్లపై దాడులు నిర్వహించడం వెనకు అంతర్యమేమిటన్నది అదాయపన్ను శాఖ అధికారులు చెప్పడం లేదు. ఈ దాడులకు సంబంధించి మరిన్నీ వివరాలు తెలియాల్సి వుంది.

జి. మనోహర్