తెలుగు భాష కోసం తమిళనాటలో పవన్ ‘దీక్ష’

Posted: 09/21/2015 10:38 AM IST

తమిళనాడులో రేకెత్తిన ఓ వివాదం నేపథ్యంలో అక్కడ దీక్ష చేపట్టేందుకు జనసేనాధిపతి పవర్ స్టార్ పవన్ కల్యాణ్ సన్నద్ధమవుతున్నారు. తమిళతంబీలు తమ మాతృభాషను ఎంతగా గౌరవిస్తారో ప్రత్యేకంగా చెప్పుకోవాల్సిన అవసరం లేదు. ఈ నేపథ్యంలోనే వారు నిర్బంధ తమిళ భాషా చట్టాన్ని ప్రవేశ పెట్టారు. ఈ చట్టంతో తమిళనాడు రాష్ట్రంలో వున్న ఇతర మైనార్టీ భాషలైన తెలుగు, కన్నడ, ఉర్దూ, మలయాళం విద్యాభ్యాసానికి విద్యార్థులు దూరమవుతున్నారని ఆయా భాషావర్గాలు ఆందోళన వ్యక్తం చేస్తున్నాయి. ఇప్పటికే ఈ చట్టానికి వ్యతిరేకంగా తమిళనాడు తెలుగు యువశక్తి, తెలుగు సాహిత్య పరిషత్ సంస్థలు హైదరాబాద్ లో ధర్నా నిర్వహించారు. ఇప్పుడు పవన్ కల్యాణ్ కూడా ఆ చట్టానికి వ్యతిరేకంగా ఈ నెలాఖరున ఆయన దీక్ష చేపట్టనున్నారని ప్రకటించారు. దీంతో పవన్ అభిమానులు, తెలుగు భాషాభిమానులు ఆయన దీక్ష కోసం సన్నాహాలు చేస్తున్నారు. అటు వైకాపాధినేత జగన్ కూడా ఈ సమస్య తీవ్రతపై స్పందించారు. తెలుగుభాషా పరిరక్షణకు ముఖ్యమంత్రి జయలలితతో తాను సంప్రదిస్తానని జగన్ హామీ ఇచ్చినట్లుగా ఆందోళనలో పాల్గొన్న తెలుగువారు తెలిపారు.