పాతబస్తీలో కాల్పుల కలకలం.. పోలీసులను ఆశ్రయించిన బాధితుడు

Posted: 09/18/2015 08:57 PM IST

గత కొన్నాళ్లుగా ప్రశాంతంగా వున్న పాతబస్తి ఒక్కసారిగా ఉలిక్కిపడింది. గొల్కండ ప్రాంతంలో కాల్పులు కలకలం సృష్టించాయి. భూ వివాదానికి సంబంధించిన విషయంలో జరిగిన వాగ్వాదం చివరకు గాలిలో తూటాలను పేల్చడం వరకు దారితీసింది. సంఘటన వివరాల్లోకి వెళ్తే... టోలిచౌకికి చెందిన కాంగ్రెస్ నాయకుడు జాబేర్‌పటేల్ కొన్ని రోజుల కిందట గోల్కొండలో ఒక ఫ్లాట్ విషయంలో స్థానికులతో గొడవపడ్డాడు. ఈ విషయం ఆనోట ఈ నోట పోలీసుల వరకు చేరింది. దీంతో పోలీసులు ఇరువర్గాల వారిని పిలిచి సర్దుబాటు చేసుకొమ్మని సలహా ఇచ్చారు.

పోలీసుల సూచనల మేరకు ఇరువైపుల నుంచి పలువురు భేటీ అయ్యి.. సమస్యను శాంతియుతంగా పరిష్కరించుకునేందుకు మార్గాలను అన్వేషించసాగారు. ఈ భేటీలో జాబేర్, సహా గోల్కొండకు చెందిన ప్రత్యర్థి ఫరీద్‌ కూడా వున్నారు. చర్చల సందర్భంగా ఇద్దరి మధ్య మాటమాట పెరిగి తీవ్ర వాగ్వదానికి దారితీసింది. ఈ క్రమంలో ఆవేశానికి గురైన జాబేర్ తన తుపాకితో మూడు రౌండ్లు గాల్లోకి కాల్పులు జరిపాడు. సమన్వయంతో చర్చిద్దామని పిలిచి తుపాకీ కాల్పులతో తనను భయభ్రాంతుడిని చేశాడని, భాదితుడు ఫరీద్ పోలీసులను ఆశ్రయించాడు.

బాధితుడు ఫరీద్ పిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు. కాగా.. జాబేర్ పటేల్ జాతీయ మైనార్టీ సెల్ కన్వీనర్‌గా బాధ్యతలు నిర్వర్తిస్తున్నట్లు సమాచారం. కేవలం కేంద్ర, రాష్ట్ర అమాత్యులకు మాత్రమే అనుమతి వున్న ఎర్రబుగ్గ వాహనాన్ని కూడా జబేర్ పటేల్ వినియోగిస్తున్నట్లు దర్యాప్తులో తెలుసుకున్న పోలీసులు అతనిపై పై పలు సెక్షన్ల కింద కేసును నమోదు చేశారు. దీంతో పాటు సంఘటనకు సంబంధించిన పూర్తి వివరాలను కూడా పోలీసులు అరా తీస్తున్నట్లు సమాచారం.

జి. మనోహర్