పెళ్లి చూద్దామని వచ్చి.. పెళ్లి కొడుకుగా మారాడు

Posted: 09/11/2015 12:49 PM IST

పెళ్లి చూద్దామని వచ్చి.. పెళ్లి కొడుకుగా మారడం ఏంటి.. ఏ సినిమా స్టోరీ అనుకుంటున్నారా..? ది సినిమా కథ కాదు.. రియల్ స్టోరీ.. తమిళనాడులో చోటుచేసుకున్న వాస్తవ కథ. తమిళనాడు తమిళనాడులోని నాగర్ కోయిల్ సమీపంలోని వడివీవ్వరం అనే ఊరిలోని అళగమ్మాల్ ఆలయంలో మణికంఠన్, ఉమాప్రియ అనే యువతీ యువకులకు వివాహం చేసేందుకు పెద్దలు నిశ్చయించారు. ఈ ఆలయంలో ఓ సంప్రదాయం ఉంది. ఆలయంలో వివాహం జరుగుతుంటే, ఇది తమకు మొదటి వివాహమే అని అమ్మవారికి తెలుపుతూ ఓ పత్రంపై సంతకాలు చేయాల్సి వుంటుంది. ఒకవేళ అమ్మవారి ముందు తప్పుడు వివరాలు ఇస్తే పాపం చేసినట్లవుతుందని.. దీనికి శిక్షతప్పదని  అక్కడి వారి నమ్మకం. అయితే మరికొద్ది సేపట్లో పెళ్లి అనుకున్న సమయానికి పెళ్లి కొడుకు భయపడ్డాడో.. లేదంటే మరేమైందో తెలియదు కానీ సంతకం పెట్టనంటే పెట్టను అంటూ మొండికేశాడు.

పెళ్లి కొడుకు ప్లేట్ ఫిరాయించడంతో అక్కడి వచ్చిన వారు. పెళ్లి కూతురు తరఫు వాళ్లు ఆశ్చర్యపోయారు. ఎంతో ఖర్చు చేసి పెళ్లికి సిద్దమైతే ఇదంతా ఏంటని వాళ్లు తలలు పట్టుకున్నారు. తాము ఇప్పటికే చాలా ఖర్చు పెట్టామని ఆ డబ్బు ఇవ్వాల్సిందేనని వధువు తల్లిదండ్రులు డిమాండ్ చేస్తూ, పోలీసులకు ఫిర్యాదు చేశారు. పోలీసులు రంగ ప్రవేశం చేసి వరుడి తరఫు బ్యాచ్ ని స్టేషన్ కు తీసుకువెళ్లారు. పోలీసుల ముందు కూడా ఆ పెళ్లి కొడుకు అదే మాట అన్నాడు. పెళ్లికి రెడీ కానీ.. సంతకం చెయ్యడం మాత్రం కుదరదు అని మొండి పట్టుపట్టాడు. సరే ఎలాగూ అక్కడి దాకా వచ్చింది కదా... వివాహం ఆగకూడదని భావించిన పెళ్లి పెద్దలు, దాన్ని చూసేందుకు వచ్చిన గోపకుమార్ అనే యువకుడితో చర్చించి పెళ్లికి ఒప్పించారు. గోపకుమార్ సైతం ఉమాప్రియను పెళ్లాడేందుకు అంగీకరించడం, ఆపై సంతకాలు, ఘనంగా వివాహం జరిగిపోయాయి. మణికంఠన్ కు ఇదివరకే పెళ్లి జరిగివుండవచ్చని, అమ్మవారికి భయపడే సంతకం చేసేందుకు వెనుకంజ వేశాడని, ఇదీ ఒకందుకు మంచిదే అయిందని పెళ్లికి వచ్చిన బంధుమిత్రులు సంతోషపడటం విశేషం. ఏం జరిగినా అంతా మంచే జరిగింది.

*అభినవచారి*