సత్యం రామలింగరాజుకు మరో షాక్.. కీలక అదేశాలు జారీచేసిన సెబీ

Posted: 09/10/2015 09:01 PM IST

సత్యం కుంభకోణంలో ప్రధాన ముద్దాయిగా వున్న సత్యం రామలింగరాజుకు మరో షాక్ తగిలింది. ఈ కుంభకోణానికి సంబంధించి సెబీ కీలక ఆదేశాలు జారీ చేసింది. కుంభకోణం ద్వారా అక్రమంగా సంపాదించిన మొత్తం తో పాటు అపరాధ రుసుమును కూడా తమకు జమచేయాలని అదేశాలు జారీ చేసింది. వివరాల్లోకి వెళ్తే.. సత్యం రామలింగరాజు లేని లాభాలను వున్నట్లుగా చూసి అక్రమంగా సంపాదించిన సుమారు రూ. 1849 కోట్లను తిరిగి చెల్లించాలని ఆయన కుటుంబంతో సహా పది మందిని ఆదేశించింది.

దీంతో పాటు మరో రూ. 1500 కోట్ల వడ్డీని కూడా అపరాధ రుసుముగా చెల్లించాలని పేర్కొంది. 2009 జనవరి 7న సత్యం కుంభకోణం వెలుగు చూసింది. లేని లాభాలు ఉన్నట్లు చూపి సంస్థ నిధులను ఇతర కార్యక్రమాలకు వినియోగించినట్లు సత్యం రామలింగ రాజు స్వయంగా వెల్లడించడంతో ఈ భారీ కుంభకోణం బయట పడింది. ఈ వ్యవహారానికి సంబంధించి గత ఏడాది జులైలో సెబీ జారీ చేసిన ఉత్తర్వులకు అనుబంధంగా తాజాగా ఈ నోటీసులు ఇచ్చింది. స్టాక్ మార్కెట్ ద్వారా అక్రమంగా సంపాదించిన రూ.1849 కోట్లను తిరిగి చెల్లించాలని రామలింగరాజు కుటుంబంతో సహా పది మందికి సెబీ ఆదేశాలు జారీ చేసింది.

జి. మనోహర్