భగత్ సింగ్... ఓ టెర్రరిస్ట్

Posted: 09/08/2015 12:46 PM IST

భగత్ సింగ్.. ఓ స్వాతంత్ర్య సమరయోధుడిగా, దేశం కోసం ప్రాణాలర్పించిన వ్యక్తిగా ఎంతో పేరు తెచ్చుకున్నారు. చిన్న పిల్లోడిని అడిగినా దీని మీద క్లారిటీగా మాట్లాడతారు. అయితే రాజకీయ నాయకులు మాత్రం మామూలు జనాలకు అతీతం కదా అందుకే వివాదాలు మాట్లాడేందుకు ముందుంటారు. మీడియా కనబడితే చాలు ఊపులో ఏదో ఒకటి మాట్లాడటం మీడియాలో పెద్ద దుమారం రేగడం జరుగుతాయి. అయితే తాజాగా ఏ రాజకీయ నాయకుడు తీవ్రమైన వ్యాఖ్యలు చెయ్యడం చర్చనీయాంశంగా మారింది. భగత్ సింగ్ గురించి అతను చేసిన వ్యాఖ్యలు దేశంలో పెద్ద దుమారాన్నే రేపుతున్నాయి. ఓ విమానాశ్రయానికి భగత్ సింగ్ పేరు పెడదామన్న ప్రతిపాదనను తోసిపుచ్చుతూ భగత్ సింగ్ మీద తీవ్ర వ్యాఖ్యలు చేశారు.

చండీగఢ్ విమానాశ్రయాన్ని ప్రధాని నరేంద్రమోదీ ప్రారంభించే సమయం దగ్గర పడుతున్నా.. విమానాశ్రయానికి పేరు ఖరారు చేయడంలో పంజాబ్, హర్యానా ప్రభుత్వాల మధ్య భేదాభిప్రాయాలు తారస్థాయికి చేరుకున్నాయి. ఇరు ప్రభుత్వాలు విమర్శలు చేసుకుంటుండగా.. అమృత్‌సర్ అకాలీద్ అధ్యక్షుడు సిమ్రన్‌జిత్‌సింగ్ మన్ కొత్త వివాదానికి తెర తీశారు. విమానాశ్రయానికి స్వాతంత్య్ర సమరయోధుడు భగత్‌సింగ్ పేరు పెట్టడాన్ని వ్యతిరేకించడమే కాక, ఆయన ఓ ఉగ్రవాది అని తీవ్ర వ్యాఖ్యలు చేశారు. భగత్‌సింగ్ స్వాతంత్య్ర సమరయోధుడు కాదు.. లేక జాతీయ హీరో కూడా కాదు. ఆయన ఓ టెర్రరిస్ట్. చండీగఢ్ అంతర్జాతీయ విమానాశ్రయానికి షహీద్ ఏ ఆజం సర్దార్ భగత్‌సింగ్ ఎయిర్‌పోర్ట్ అని నామకరణం చేయడాన్ని మేం తీవ్రంగా వ్యతిరేకిస్తున్నాం అని పేర్కొన్నారు. పంజాబ్ సీఎం ప్రకాశ్‌సింగ్ బాదల్ అమృత్‌సర్‌లో అంతర్జాతీయ విమానాశ్రయాన్ని ఏర్పాటుచేయడంలో విఫలమయ్యారని, ఆయన, వారి బంధువులు చండీగఢ్‌లో పెద్దఎత్తున భూములు కొన్నారని.. అందుకే పేరు విషయంలో మౌనం వహిస్తున్నారని విమర్శించారు. బీజేపీ ఎంపీ సంజయ్‌టాండన్ మాత్రం విమానాశ్రయంపై పేరుపై ఎలాంటి విభేదాలు లేవని స్పష్టం చేశారు.