ITEMVIDEOS: భార్య శవంతో బస్టాండ్ లో ఆ కూలీ

Posted: 09/02/2015 07:11 PM IST

సమ్మె సామాన్యులకు చుక్కలు చూపించింది. రెక్కాడితే కానీ డొక్కాడని పేదలకు ప్రాణసంకటంగా మారింది. పొట్ట చేతపట్టుకుని వలస వెళ్లిన పాలమూరు మహిళ పురిటినొప్పులతో బాధపడుతూ బిడ్డకు జన్మనిచ్చి కన్నుమూసింది. కార్మికుల సమ్మె కారణంగా రవాణా వ్యవస్థ స్థంభించడంతో స్వగ్రామానికి చేరుకోవడం ఆ కుటుంబానికి గగనమైంది. భార్య శవంతో, ఇద్దరు పిల్లలు, చంటిబాబుతో అతను పడ్డ అవస్థ అంతా ఇంతా కాదు. మహబూబ్ నగర్ జిల్లా ఉట్కూర్‌కు చెందిన మహ్మద్ షఫీ పొట్టకూటి కోసం హైదరాబాద్‌కు వలస వెళ్లాడు. కూలీపనులు చేస్తూ భార్య , ఇద్దరు పిల్లలను పోషించుకుంటున్నాడు. షఫీ భార్య నిండు గర్భవతి. రోజూమాదిరే కూలీకి వెళ్లిన షఫీ ఇంటికి తిరిగొచ్చేలా పురిటినొప్పులతో ఆసుపత్రిలో చేరింది. కాటేదాన్‌లోని ఓ ప్రైవేట్ ఆస్పత్రిలో డెలివరీ అయింది. మగశిశువుకు జన్మనిచ్చి హాస్పటల్లోనే కన్నుమూసింది.

భార్య అంత్యక్రియలు చేయడం కోసం షఫీ తన పిల్లలను తీసుకుని ఉట్కూర్‌కు బయలుదేరాడు. భార్య శవంతో పాటు ముగ్గురు పిల్లలతో సహా ఈ తెల్లవారు జామున ఐదున్నరకు బస్సులో మహబూబ్‌నగర్‌ చేరాడు. ఐతే కార్మికుల సమ్మె కారణంగా సొంతూరుకు చేరుకోవడం ఇబ్బందిగా మారింది. ప్రైవేటు వాహనంలో తీసుకెళ్లే స్తోమత లేక షఫీ తీవ్ర ఆవేదనతో కన్నీరుమున్నీరుగా విలపించాడు. పాలమూరు బస్టాండులో కనిపించిన ఈ దృశ్యాలు చూపరులను కలిచివేశాయి. స్పందించిన కొంతమంది ఆర్ధికసాయం అందించి ప్రైవేటు వాహనంలో షఫీని స్వగ్రామానికి పంపారు.