19 లక్షలు పెట్టి పిల్లికి వైద్యం.. హవ్వ..!

Posted: 08/21/2015 04:38 PM IST

కొందరికి పెంపుడు జంతువులంటే ప్రాణం. వాటిని ఎంతో ప్రేమగా చూసుకుంటారు. తమ ప్రాణాలకు మిన్నగా పెంచుకుంటారు. వాటికి ఏ చిన్న ఆపద వచ్చినా అస్సలు తట్టుకోలేరు. దాని కోసం విలవిలలాడిపోతారు. అమెరికాలోని ఓ జంటకు కూడా ఆ పిల్లి అంటే కన్న కొడుకుతో సమానం. ఎంతో మురిపెంగా చూసుకునే ఆ పిల్లికి అనారోగ్యం వచ్చింది. దీంతో వారు చాలా బాధపడ్డారు. మూత్రపిండాల వైఫల్యంతో చావుకు చేరువైన పిల్లిని కాపాడుకునేందుకు వారు చాలా రిస్కే తీసుకున్నారు. ఏకంగా 19లక్షలు ఖర్చు చేసి దానికి ఆపరేషన్ చేయించారు. మళ్లీ తమ బిడ్డను కాపాడుకున్నారు.

అమెరికాలోని బఫెలో సిటీకి చెందిన ఆండ్రీ గాన్సియర్ దంపతులు ఆ పిల్లికి శస్త్రచికిత్స చేయించారు. కొన్నేళ్ల క్రితం వారికి ఈ పిల్లి దొరికింది. దానికి ఒకీ అని పేరు పెట్టి పెంచుకుంటున్నారు. ఈ మధ్య అనారోగ్యానికి గురి కావడంతో ఆపరేషన్ చేయించారు. ఇందుకోసం వారు మరో పిల్లిని దత్తత తీసుకుని దాని నుంచి ఒక కిడ్నీని తీసి ఒకీకి అమర్చారు. పెన్విల్వేనియా వర్సిటీ వెటర్నరీ ఆస్పత్రి వైద్యులు ఈ ఆపరేషన్ చేశారు. శస్త్రచికిత్సకు రూ.10లక్షలు, మిగతా వాటికి 9లక్షలు ఖర్చయ్యాయి. ప్రస్తుతం ఆ రెండు పిల్లులూ కోలుకుంటున్నాయని యజమాని తెలిపాడు. డబ్బు పోతే పోయింది మా బిడ్డ బాగయ్యాడు..అది చాలు అంటున్నారు గాన్సియర్ దంపతులు.