నిరుద్యోగులకు శుభవార్త.. టిఎస్‌పిఎస్సీ నోటిఫికేషన్ విడుదల

Posted: 08/19/2015 05:51 PM IST

Tspsc notification released chairman ghanta chakrapani press meet

ఎంతోకాలంగా ఎదురుచూస్తున్న నిరుద్యోగులకు శుభవార్త. తెలంగాణ రాష్ట్ర పబ్లిక్ సర్వీస్ కమిషన్ తొలి నోటిఫికేషన్ విడుదలైంది. 3783 ఉద్యోగాలను భర్తీ చేయనున్నారు. బుధవారం టీఎస్పీఎస్సీ చైర్మన్ ఘంటా చక్రపాణి ఈ మేరకు నోటిఫికేషన్ విడుదల చేశారు. అసిస్టెంట్ ఎగ్జిక్యూటివ్ ఇంజనీర్ల పోస్టులకు సెప్టెంబర్ 20న పరీక్ష నిర్వహించనున్నారు. హైదరాబాద్, వరంగల్, కరీంనగర్, ఖమ్మం కేంద్రాల్లో ఆన్లైన్ విధానం ద్వారా పరీక్షలు నిర్వహించనున్నట్టు ఆయన తెలిపారు. ఈ నేపథ్యంలోనే ఆయన ఈ ఉద్యోగాల విషయమై విస్తృత సమాచారం తెలియజేస్తూ ఇలా అన్నారు...

* సెప్టెంబర్ 20వ తేదీన అసిస్టెంట్ ఎగ్జిక్యూటివ్ ఇంజనీర్ ఉద్యోగాలకు పరీక్ష నిర్వహించనున్నాం.
* ఈ నెలాఖరులోగా గ్రూప్ 1, 2 పరీక్షలకు సంబంధించిన సిలబస్ను ప్రకటిస్తాం. నిజానికి సిలబస్ వివరాలను ఉద్యోగ ప్రకటనతో మాత్రమే ఇవ్వాలి. కానీ.. కొత్త సిలబస్ కాబట్టి ముందుగా చదువుకునే అవకాశం ఉంటుందని సిలబన్ ను ముందుగానే ప్రకటిస్తున్నట్టు చెప్పారు.
* అక్టోబర్ చివరిలో గ్రూప్ 2 నోటిఫికేషన్.. డిసెంబర్ లోపు ఉద్యోగాల నియామకం ఉంటుందని స్పష్టం చేశారు.
* గ్రూప్ 1కు ఇంకా కొన్ని సమస్యలున్నాయని.. వాటిలో 53 పోస్టులను తమకిచ్చారని.. వాటిలో కొన్నింటికి సంబంధించి న్యాయపరమైన సమస్యలున్నాయని తెలిపారు.
* కమలనాథన్ కమిషన్ నివేదిక వచ్చిన తర్వాత మరికొన్ని కొత్త ఖాళీలు రావచ్చని, వాటి ఆధారంగా వాటిని బట్టి నవంబర్ నోటిఫికేషన్లో మరిన్ని ఉద్యోగాలు వచ్చే అవకాశముందని చెప్పారు.
* ఈ ఏడాది డిసెంబర్ లోపు 80 శాతం నియామకాలను పూర్తి చేయాలనుకుంటున్నట్లు స్పష్టం చేశారు.
* మార్చికల్లా గ్రూప్ 2 నియామకాలు మొత్తం పూర్తవుతాయని.. ప్రభుత్వం గ్రీన్ సిగ్నల్ ఇస్తే.. జరిగిన లోపాల్ని సవరించి డిసెంబర్లోనే గ్రూప్ 1 నోటిఫికేషన్ ఇవ్వనున్నట్లు వెల్లడించారు.
* ఈసారి నియామకాలు పారదర్శకంగా వుంటాయని.. విశ్వాసం వున్న వాళ్లు దరఖాస్తు చేసుకోవచ్చని పిలుపునిచ్చారు. వివాదాలకు తావులేకుండా పరీక్షలు నిర్వహించాలని అనుకున్నట్లుగా పేర్కొన్నారు. ఎవరైనా అడ్డుకుంటే తామేమీ చేయలేమని ముందుగానే హెచ్చరిస్తున్నారు.